2 PATAY, KRITIKAL
Managlahing kaso sa pagpamusil sa lalawigan
TULO ka mga lalaki ang gipamusil sa managlahing dapit sa lalawigan sa Sugbo, duha ang patay ug usa ang kritikal.
ARGAO
Ala 1:40 sa kaadlawon kagahapon, usa ka ulitawo nga gikan nitambong og disko sa Sitio Pangondangan, Barangay Tigib, lungsod sa Argao, gipusil sa wala mailhing tawo nga nagpahipi sa ngitngit nga dalan.
Atol ning pagsuwat, kritikal sulod sa ospital ang biktima nga si Eugene Cornel, 36, ulitawo ug taga Barangay Poblacion, Argao tungod sa grabe naangkon nga samad pinusilan sa tangkugo, bukobuko ug lubot.
Si P03 Renato Nacaytona, desk officer sa Argao Police Station nga nahinabi sa DYSS Super Radyo ug Sun.Star Superbalita, nibutyag nga nga ang biktima nisuroy sa maong lugar tungod sa disko sa kasaulogan sa piyesta.
Human siya nalingaw sa diskuhan, nigawas ug nagpahangin sa ngitngit nga dapit apan kalit siyang gipauwanag bala sa wala mailhing tawo.
Matod ni Nacaytona, posibling gisuyaan lang ang biktima nga nisuroy sa maong lugar.
CARCAR
Kagahapon sa alas 6:30 sa buntag, usa ka hamtong nga lalaki nga kanhi nalambigit sa ilegal drugas ang gipusilpatay samtang naglakaw sa karsada sa Sitio Dapdap, Barangay Poblacion 2, dakbayan sa Carcar.
Si Demosthenes Mabitad, 38, ulitawo, walay trabaho ug molupyo sa nahisgutang dapit, namatay paglabay sa pipila ka minutos dihang nadangat sa Provincial District Hospital sa Carcar.
Nakaangkon kini og samad pinusilan sa ulo ug nagkadaiyang bahin sa lawas gikan sa bala sa wala pa matino nga kalibre sa armas.
Wala pa mailhi sa kapulisan ang mamumuno nga nagsakay sa motorsiklo kolor itom nga XRM nga nagtabon sa iyang nawong nga paspas misibat sa nahisgutang lugar human sa krimen.
Si SPO1 Jose Jamasaki Repompo sa Carcar Police nga nahinabi sa DYSS Super ug Sun.Star Superbalita, nagkanayon nga ang biktima naginusara nga naglakaw sa dapit ug kalit nga niabot ang mamumuno.
Walay kabhang nga nakuha ang kapulisan dihang naabot sa crime scene.
Si Repompo niingon nga walay nakaila sa namusil sa nahisgutang dapit sanglit sayo pa kaayo ug kalit ang panghitabo.
Hinuon, wala nila isalikway ang mga posibilidad nga nalambigit sa illegal nga kalihukan o posibling dunay tawong gikaatraso sa dapit.
Ang imbestigador sa kapulisan nisusi karon sa tanang anggulo nga posibling motibo sa krimen, ang pagkasikop niadto sa biktima sa kasong illegal nga drugas.
LAPU-LAPU
Niadtong Sabado sa alas 8:00 sa gabii, patay ang usa ka lalaki human gipusil sa tulo ka mga wala mailhing tawo sa Barangay Bangkal, dakbayan sa Lapu-Lapu.
Ang biktima giila nga si Elizaldo Estrada, 39, ulitawo ug molupyo sa nahisgotang dapit.
Si SPO1 Allan Pantaleon sa Homicide section nga nahinabi sa Sun.
Star Superbalita, nibutyag nga ang biktima didto lang gawas sa kuwarto nga iyang gipuyan sa dihang gipusil sa makadaghang higayon.
Ang biktima naigo sa nagkadaiyang bahin sa lawas nga niresulta sa pagkamatay niini dihadiha.
Nakuha gikan sa crime scene ang unom ka kabhang sa bala ug tulo ka slug nga iya sa kalibre .45.
Sigun sa mga nakasaksi, adunay tulo ka mga wala mailhing tawo ang ningsulod sa ilang lugar sa wala pa nahitabo ang krimen.
Sa pagkakaron, ang kapulisan sa Lapu-Lapu padayon pa sa ilang gihimong imbestigasyon kon unsay motibo sa pagpamusil ug si kinsa ang mga responsabli.
Matod ni Pantaleon, ila pa usab nga gisusi ang pagkatawo sa biktima kon wala ba usab kini malambigit sa illegal nga kalihukan.