Comelec mosugod na sa registration
MOBALIK nag pagpangrehistro ang Commission on Elections (Comelec) sugod ugma alang sa umaabot nga eleksiyon karong 2016.
Ang mga registration form nga gikan sa kaulohan ang nahiabot na sa Cebu Provincial Comelec Office sa niaging semana.
Si Atty. Ferdinand Gujilde, provincial election officer, niawhag sa mga bag-ong botante nga mobisita sa mga buhatan sa Comelec sa ilang lugar aron marehistro.
Siya niawhag usab sa mga narehistro na nga susihon sa ilang opisina kon aduna na ba sila biometrics tungod kay ubos sa Republic Act (RA) 10367 kadtong way biometrics kinahanglan magpa- biometrics aron makaapil sa 2016 presidential election.
“Otherwise kon way biometrics we will deactivate and they are not allowed to vote,” nagkanayon si Gujilde dihang nahinabi sa mga tigbalita sa Kapitolyo niadtong Biyernes.
Dinhi sa Sugbo, mo- abot sa 2,598,534 ang mga rehistradong botante apil na ang gikan sa mga dakbayan sa Sugbo ug Lapu-Lapu.
Sa naasoyng gidaghanon, 262,653 ang kuwang o way biometrics data sama sa hulagway sa botante nga kuha sa data capturing machine, fingerprints ug digital signature.
Hangtod pa sa Oktubre 31, 2015 ang pagpangrehistro sa Comelec, sa mga adlawng Dominggo ngadto sa Huwebes gikan sa alas 8:00 sa buntag hangtod sa alas 5:00 sa hapon.
Matod niya giapil nila ang Dominggo aron mahatagan og higayon ang mga trabahante ug mga estudyante nga makaparehistro.
“Para di na gyud sila ka rason nga moabot sila sa last minute kay working sila, nag-eskwela sila,” dugang ni Gujilde.
Siya nihangyo sa mga magparehistro nga di magpaabot sa kataposang adlaw sa registration.
“Kay we have one year and five months to register. Palihug ayaw paabot sa deadline and blame the Comelec,” siya namahayag.
Nabatasan na sa ubang mga tawo nga sa kataposang adlaw na modagsa sa mga buhatan sa Comelec aron magparehistro.
Ang kwalipikadong makaparehistro kadtong mag-edad og 18 anyos sa di pa o sa mismong adlaw sa Mayo 9, 2016, Filipino citizen, nagpuyo sa Pilipinas sud sa usa ka tuig sa di pa ang eleksiyon ug unom ka buwan sa dapit diin kini buot marehistro.
Ang magparehistro giawhag usab sa pagdala og balido nga ID sama sa school o company ID, passport, driver’s license ug ubang government issued identification cards.
Ang Comelec mahimong modawat sa National Bureau of Investigation (NBI) clearance.
Sud sa registration period, modawat usab ang Comelec og aplikasyon pag- transfer og registration, correction of entries, ug change of status.