Senior citizen ward sa CCMC

GITINGUHA karon sa konsehal sa dakbayan sa Sugbo nga himoan og “Senior Citizens Ward” ang mga lolo ug lola nga malandig sa Cebu City Medical Center (CCMC).

Si Konsehal Mary Ann de los Santos, kinsa maoy chairman sa CCMC Board, niumol og ordinansahon aron sa pormal nga paghatag og kaugalingong ward sa mga senior citizen apan kasamtangan una kining gipadaplin sa konseho alang sa dugang pakisusi.

Gikutlo sa konsehal ang Section 2, Article II sa 1987 Constitution nga nagkanayon nga kaakohan sa pamilya ang pag-amuma sa mga tawong edaran apan ang estado mahimo usab nga mohimog programa alang sa mga tiguwang.

Gisegundahan usab kini sa Section 458 sa Republic Act (RA) 7160 nga mandato sa Sangguniang Panglungsod isip legislative body sa siyudad sa paghimo og ordinansahon alang sa kaayohan sa katawhan sa siyudad alang sa mga tawong kabos, masakiton, adunay deperensiya sa pangisip, mga giabandonar nga mga minor, tawong nagumon sa druga, giabusohan nga bata ug kadtong mga tawo nga labaw nga nanginahanglan.

Gawas niini, ang RA 9257 kon Expanded Senior Citizens Act of 2003, nagmando usab nga palapdan ang pribilihiyo nga makuha sa mga lolo ug lola lakip na ang medical ug ubang serbisyo nga gikinahanglan.

Anaa usab sa RA 1939 nga ang tanang publikong tambalanan kinahanglan mo- operate nga di mokunhod sa 90 porsiyento per centum sa ilang bed capacity isip libre o charity beds.

Matod ni Delos Santos nga ang paghatag og libreng pagpatambal ug medisina sa panahon nga masakit ang mga senior citizen makabaton kini hapsay nga panghunahuna.

Ang CCMC naguba sa linog ug nahuman nag- demolish diin ipabarog sa City Government ang bag-o ug modernong tambalanan sa umaabot nga katuigan nga gastuhan og kapin o kulang P1 ka bilyon alang sa hingpit nga katukoran niini.