3 biktima sa lungkab sa Pinamungajan

GIPAHIBAWO sa usa ka menor de edad nga sakop sa choir sa Santa Monica Parish ngadto sa kapulisan sa Pinamungajan Police Station nga adunay lungkab nga nahitabo alas 4:30 sa hapon lungsod sa Pinamungajan kagahapong adlawa.

Matod ni Raymond Casas Makiling, 17, ulitawo ug sakop sa choir nga nakita niya ang suspek nga daling nibiya gikan sa lawak sa coop sa simbahan diin didto nakabutang ang ilang mga kabtangan.

Daling nirespondi ang kapulisan sa lugar ug didto nila nahibaw-an nga giguba sa wa mailhing suspek ang lock sa coop ug gikuha ang mga kabtangan sa mga biktima.

Gawas kang Makiling lakip sa biktima silang Juliet Panarez, 62, minyo ug Maria Eudis Caraqui-an, 29, dalaga, nga pulos mga residente sa Barangay Pandacan, Pinamungajan.

Nakuha sa mga biktima ang salaping cash nga P5,150, Cherry Mobile phone nga nikantidad og P1,500, tulo ka mga camera nga ang duha niini Samsung samtang ang usa Sony nga nagkantidad ang tanan og P63,000 ug spare battery nga nibalor og P1,000.

Ang tanang butang nga nakuha gikan sa mga biktima nikantidad kinig P70,650.

Matod sa kapulisan nga sa ilang pagresponde nakita nila ang suspek sa koral dala ang tulo ka puntil nga sudlanan sa camera ug mga bag nga wa nay sud.

Nagduda ang kapulisan nga gipasa na ang mga kabtangan nga ilang nakuha ngadto sa iyang kauban.

Ang nadakpan nga suspek mao si Alberto Aloy Pasculado, 25, ulitawo, manindahay og tubig ug residente sa Barangay Ylaya, Negros Occidental apan kasamtangang nagpuyo sa B. Rodriguez St., dakbayan sa Sugbo.

Sa pagkakaron, nagpahigayon ang kapulisan og tactical interrogation sa suspek ug andam mopasakag kaso ang mga biktima batok kang Pasculado. Lucille Marie A. Gomez, NORSU Masscomm Intern ug Mary Rose Z. Sarino, CNU Comm Intern