Gipatay tungod sa pamahaw
(Napatik sa Superbalita Davao, Abril 29, 2014)
ANG kapulisan nakaila na sa tawo nga mipatay sa iyang agalon didto sa El Rio Vista Village, Barangay 19-B Poblacion, siyudad sa Davao.
Ang hinungdan sa krimen tungod kay gikaon sa suspek ang pamahaw sa biktima duha na ka semana ang milabay.
Si San Pedro Police Station commander Supt. Joel Consulta, sa pakighinabi kaniya sa Sun.Star niadtong Abril 28, niila sa suspek nga si Russel Parasan, alias Alex, 18, house boy, lumad nga taga Barangay Socob, Solumbio, Sultan Kudarat.
Ang biktima mao si Clemen Cherryl Sabando Dancel, 29, call center agent, kinsa lumad sa Tacurong, Sultan Kudarat ug temporaryong nagpuyo sa El Rio Vista Village.
Si Consulta nagsulti nga nagtuo sila nga ang suspek nagtago na karon sa Sultan Kudarat human ang itom nga Honda Bravo nga motorsiklo, dunay plate number 6066 MC, gipanag-iya sa biktima, nga gigamit sa suspek sa iyang pag-ikyas, narekober sa lungsod sa Columbio niadtong Abril 27.
Matod ni Consulta nga nakigkoordinar na sila sa Sultan Kudarat Provincial Police Office aron sikupon ang suspek.
Dugang pa niya nga ilang ipasaka ang kaso niadtong Mayo 2 subay sa hangyo sa amahan sa biktima.
Sa imbestigasyon ni PO3 Rizalito Clapiz III sa San Pedro Police Station milutaw nga ang insidente nahitabo niadtong Abril 14, Lunes Santo.
Mga silingan sa biktima, kinsa nagdumili nga panganlan, nagsulti sa kapulisan nga nakadungog sila nga gikasab-an sa biktima ang suspek tungod kay gikaon ang iyang pamahaw. Pipila ka minuto ang milabay, nadungog usab nila nga misinggit ang biktima nga, “Ayaw, tama na!” sa wa pa nakadungog ang kusog kaayo nga sonata sa stereo.
Ila sab nakita ang suspek nga gibuslotan ang ligid sa sakyanan sa biktima dayon misakay sa motorsiklo.
Sanglit wa napawong ang sonata hangtod niadtong Miyekules Santo, gisusi na sa mga silingan ang balay sa biktima diin nadi- kubre sa mga opisyal sa barangay nga dunay dugo sa balay dayon ilang nakita nga giputos ang biktima og panapton.
Sa pagresponde sa Scene of the Crime Operatives (SOCO), nasuta nga daghang samad tinigbasan ang naangkon sa biktima gamit ang 24 pulgadas nga lagaraw.