Maligo ta sa Buntod Sandbar sa Masbate
BEACH lover ka ba ug nangita og dapit nga bakasyonan gawas sa Sugbo? Summer adventure sa beach ang imong trip? Adto sa Buntod Sandbar and Reef Marine Sanctuary sa Masbate!
Ang probinsya sa Masbate may matahom nga mga island beaches ug marine sanctuaries, usa niini ang Buntod nga 250 ektarya nga makit-an tungatunga sa dagat sa Barangay Nursery ug Barangay Tugbo.
Inyong matagamtaman ang kabugnaw, kalimpyo ug katin-aw sa tubig sa baybayon. Matingala ka sa kanindot sa mga sea creatures kay adunay gipasigarbo nga mga kalihokan niini sama sa snorkeling, scuba diving ug bird watching.
Paingon sa Buntod adunay pumpboat nga pwede maabangan.
Ang plete sa bangka modepende sa kadaghanun sa pasahero nga mosakay.
Mohatag usab og masakyan ngadto sa sanctuary ang Rendezvous Hotel and Beach Resort subay sa dan sa nursery. Mahimo usab nga maka check-in sa hotel kay kini ang labing duol nga pahilunaan sa Buntod.
Samtang, di problema ang lugar kon asa pwede makakaon didto kay adunay nipa o cottage sa tunga sa sandbar nga naa nay mga lamesa ug lingkuran alang sa dako nga grupo. Aduna usab silay cooking ug grilling area nga hamugaway alang sa pagluto.
Sa pagkakaron, ang Buntod anaa sa ikaduhang pwesto sa Most Resilient Marine Sanctuary sa Central Philippines, matod ni Romeo Soria Jr., miyembro sa Samahang Mangigisda ng Puro-Sinalikway, grupo sa tigatiman sa sanctuary.
Alang sa dugang impormasyon sa presyo sa diving ug boat rental, kontaka si Romeo Soria Jr. sa 09074542004.
RODEO FESTIVAL
Gawas sa mga beach resort, gipasigarbo usab sa Masbate ang tinuig nga Rodeo Masbateño Festival nga ipahigayon sa katapusang semana sa Marso ug motapos sa ikaduhang semana sa Abril nga nasugdan og pahigayon niadtong 1993. Ang Masbate gitawag nga “Cattle Country of the Philippines.”
Daghang mga kalihokan sama sa lingaw nga parada sa mga horseback riders, livestock handling, lakip ang karambola, lassoing, wrestling, whipping ug riding sa mga baka. Apil usab ang carnival, exhibitions sa mga baka ug kabayo lakip ang trade fair sa mga produkto sa dapit.
Mangapil sa mga festival ang mga lokal ug international cowboys ug bull riders sa kompetisyon.
Mabisita nimo ang Masbate pinaagi sa pagsakay og barkong Trans-Asia sa Pier 3 diin 12 ka oras ka nga mobiyahe gikan sa Sugbo sa plite nga P605.
Inig naog nimo sa Masbate City pier adunay mga tricycle nga pwede nimo masakyan padung sa hotel nga imong pahilunaan sama GV Hotel ug Victoria Du Hotel nga parehong P450 ang matag kwarto nga alang sa duha ka tawo.