‘Sextortion’

NABANIOG ang lungsod sa Cordova dinhi sa lalawigan sa Sugbo sa cybersex nga gihimo sud sa kabalayan. Sa pipila ka kaso nga nadiskubrehan, ang mga ginikanan mismo maoy migamit sa ilang kaugalingong mga anak nga mga menor de edad nga gipahubo atubangan sa camera aron lang makakitag kuwarta.

Gihimo na kining paagi sa panginabuhi. Mao ni matang sa panginabuhi nga di magkinahanglag sinina kay maghubo man atubangan sa camera.

Apan di ni maayo alang sa Pilipinas kay abi pa lang sa mga langyaw, hilabihan na kakabus ang atong nasod nga ang mga tawo, labi pang atong kabataan, di na makapalit og sinina nga ilang ikasulob.

Apan duna pay mas grabe sa cybersex. Mao kini ang gitawag nga “sextortion.” Si Philippine National Police chief Alan Purisima niingon nga ang mga sakop sa sindikato nga nagpaluyo sa sextortion sekreto nga mokuhag video sa mga biktima nga maghubo o nakigcybersex.

Dayon hulgaon ang biktima nga ipadala ang ilang video ngadto sa ilang mga paryente ug mga higala kon di sila mobayad og gikan sa 500 dolyares ngadto sa 1,000 dolyares.

Lahi ni sa cybersex sa Cordova nga ang mangwarta maoy maghubo. Sa sextortion, ang maghubo maoy pangwartahan ug pangwartahon.

Giunsa man kini nila paghimo? Sumala pa ni Purisima, ang sextortion syndicate mohimo og peke nga Facebook account kunohay sa mga batanon ug makadani nga mga babaye.

Agnihon ang mga biktima pinaagi sa mga pornographic materials human sila magchat online o pinaagi sa ilang computer.

Kadtong mga biktima nga masud na sa laang magpakita sa ilang hubo nga lawas o kaha naghimog cyber sexual acts, matarantar ug daling mobayad kon hulgaon nga ipadayag ang ilang sekretong video, susama sa mga sex scandals nga nikatap dinhi sa ato.

Ang kapulisan sa lainlaing nasod naukay nga morag putyokan sa dihang usa ka Scottish teenager nga gi- blackmail sa sextortion syndicate nagunay pahunos sa iyang kinabuhi.

Sumala pa sa taga Cabadiangan, ang tawo usahay maunay og kabitik sa laang nga iyang gihimo. Busa, ning bago lang, gironda sa kapulisan ang naghimo sa sextortion didto sa Manila ug gisikop ang labing menos 58 ka mga suspek may kalambigitan sa maong sindikato.

Wa silang kaugpo kay ang atong kapulisan gipaluyohan man sa mga imbestigador gikan sa Interpol, United States Homeland Security Department ug uban pang mga ahensiya sa kapulisan nga maoy nagsubay sa mga online chat sa ilang mga biktima.

Nagtuo ang mga sakop sa sindikato nga sekreto ang ilang gihimo apan natultolan ra diay gihapon sila sa kapulisan.