Hulga sa huwaw

GIPAABOT nga magsugod ang huwaw sa hinapos ning buwana, sumala sa weather bureau nga Pagasa, apan nagsugod na gani kini sa ubang rehiyon sa nasod sama sa Luzon ug Mindanao.

Tungod sa paglagiting sa kainit sa adlaw, nagnihit ang tubig ug miubos ang lebel niini sa dam, ang usa sa mga nag-unang tinubdan sa elektrisidad sa ubang dapit sa nasod.

Ang nakapatingala, ang huwaw gibanabana nga moigo sa pagsulod sa panahon nga naandan nga ting-uwan sa sunod buwan? Makalibog ug makahinuklog labi na sa hamtong henerasyon nga nakasinati sa normal nga pagtuyok sa sistema sa panahon.

Kon atong pamalandungan pag-ayo, ang huwaw usa lang sa mga sumbalik nga katalagman gikan sa kinaiyahan nga nagusbat tungod sa subrang pagpahimulos ug pag-abusong kalihokan sa katawhan sulod sa pipila na ka siglo sa ngalan sa ‘kalamboan’ ug modernisasyon nga nakaapekto sa klima sa tibuok kalibotan.

Gikan sa ginagmay nga pagkaingin ug pagpamutol sa kakahuyan nga nakaguba sa kalasangan ngadto sa pagbuga og pulyusyon mugna sa mga dagkong industriya ug pabrika, kining tanan mahukmanong nagguba sa gambalay sa atong planeta nga gipuy-an.

Sa pikas bahin, daghan nang naamgo ug mihimo og kalibotanong kampanya sa pagsanta sa dugang pagkadaut ug pagpalambo sa kinaiyahan, subay sa atong mga ginagmay o dinagkong lakang sa kanasoran.

Apan ang nag-unang pangutana karon: andam na ba kita sa posibleng huwaw? Unsay gihimo sa kagamhanan aron dili na modangop sa pagbasol sa uban sama sa gihimo ni Presidente Aquino batok sa electric cooperatives sa Mindanao bahin sa problema sa dakong kuwang sa power supply.