P1 milyon nga suweldo?

GIPALABANG ni Senador Antonio Trillanes IV ang balaudnon nga nagtinguha sa pag-usbaw sa suweldo sa mga kawani ug opisyal sa gobiyerno. Ubos sa Senate Bill 1689, apil sa patas-an mao ang suweldo sa Presidente nga mahimong moabot ngadto sa P1 milyon matag buwan.

Matod ni Trillanes nga gamay ra kaayo ang suweldo sa Presidente nga P120 mil matag buwan. Samtang sa mga Kongresista ug mga Senador, gisugyot ni Trillanes nga matag usa nila mosuweldo og labing minus P350 mil matag buwan. Sa mao nga balaudnon, ang mga cabinet members mosuweldo og mga P600 mil ngadto sa P800 mil matag buwan.

Ang punto ni Trillanes nga ang pagtaas sa suweldo sa mga nag-alagad sa gobyerno makapaminus sa tintasyon sa korapsyon. Gipanig-ingnan ni Trillanes ang Singapore ug Hong Kong nga dagko og suweldo ang mga kawani ug opisyal sa gobyerno.

Gigamyan diay si Trillanes sa suweldo sa Presidente nga tag P120 mil matag buwan? Gamay ra ni Trillanes ang suweldo karon sa mga Kongresista ug mga Senador nga tag P90 mil matag buwan?

Hinuon kay mas bongga ang ilang lifestyle kon itandi sa yanong katawhan, posible nga gamay ra para nila ang mao nga suweldo.

Apan mora man og gilipat ni Trillanes ang katawhan. Wala man mahisgoti ni Trillanes nga gawas sa P120 mil nga suweldo sa Presidente, duna pa siyay dagkong kuwarta nga mahimong anggaan og honorarium, allowances, social fund, discretionary fund nga dili na maabot sa mga kamot sa Commission on Audit (COA).

Sa mga Kongresista ug Senador, gawas sa ilang tag P90 mil nga suweldo, duna pay minilyon nga honorarium sa matag komitiba nga ilang gihuptan. Mao usab ang mga cabinet members nga adunay dagko nga bonuses ug allowances gawas sa dagkong sweldo.

Ang korapsyon sa Pilipinas sa mga dagkong opisyal sa gobyerno dili tungod kay gamay ra ang ilang suweldo. Ang tinuod mao nga nahimo nang kultura sa mga dagkong opisyal sa gobyerno ang pagpangkorap. Ang uban kanila addicted na sa pagpangawat sa buhis sa katawhan.

Daghan kanila kuwang sa moral foundation, mao nga ang kinawatay sa kaban sa katawhan daw nahisama na sa sakit nga kanser. Ang ilang pagka way katagbawan ug kahangol maoy nagtukmod kanila sa pagpangawat sa kaban sa katawhan.

Mahimong mouyon ta sa balaudnon ni Trillanes alang sa usbaw sa suweldo sa gipanggutom nga mga kawani sa gobyerno sama sa mga polis, sundawo, mga magtutudlo ug nag-alagad sa tambalanan.

Insulto sa katawhan nga nagkalisod nga hatagan pa og dakong sweldo ang mga opiusyal sa gobyerno nga wa gani tarong serbisyo.