Disgrasya sa mall

Mas maayo pa ang tindera sa usa ka stall kay nitunol pa og lingkuranan. Nipauli si misis nga nagbalon og grabing kaguol. Sa iyang asoy nako kulang sa pasidaan ba kaha barrier aron di madisgrasya ang kustomer nga nabisi sa pagpamili

PAGBUTO ining balita sa usa ka bata nga nahagbung sa sulod sa mall, daghang mensahe ang akong nadawat sa Facebook ug sa text. Daghan ang nakugang ug daghan ang nipadayag og mga opinyon, sugyot ug komentaryo. Duna say nitunol og mga inpormasyon labot sa mga mall nga ilang nadiskitaan nga may bikil sa panlihoklihok sa ilang mga kustomer.

NALIGID

Ang akong misis naligid ug nalamba sa usa ka mall niadtong Marso. Dunay usa ka bahin sa mall nga nagpundok ang daghang stall ug nagbaligya ug mga gadgets. Samtang siya namili wala siya ka bantay ug sa sigi niyang atras ug wala siya ka bantay nga ang usa niya ka tiil didto na diay padung sa ngilit sa hagdanan nga may gihabugon nga tulo ka angang. Nawad-an siya sa balanse ug naligid padulong sa ubos. Nanakit ang iyang kalawasan, ulo ug duha ka tiil. Kahilakon siya nga nibangon nga nag-inusara. Dihay guwardiya nga nakasaksi apan nagtan-aw lang way gihimo.

Way management nga nagpakabana.

Mas maayo pa ang tindera sa usa ka stall kay nitunol pa og lingkuranan. Nipauli si misis nga nagbalon og grabing kaguol. Sa iyang asoy nako kulang sa pasidaan ba kaha barrier aron di madisgrasya ang kustomer nga nabisi sa pagpamili. Ang maong tulo ka ang-ang nga hagdanan mura man og gisalipdan mao nga di kaayo mabantayan sa mga kustomer nga delikado kaayo nga malahos ang ilang tiil. Unta to butangan og ali ang pabor sa mubo nga hagdanan aton nga di magpataka og sibug ang kustomer.

CCTV

Dunay CCTV camera ang maong bahin sa mall ug nakasiguro ko nga recorded ang maong panghitabo. Sa pagtuo ni misis nga wa magtagad ang management sa nahitabo niya kay hangtod karon wala man usba ang desinyo sa nadisgrasyahan niya. Ang CCTV di man para sa kriminal lang. Apil ni nga mo- monitor sa mga panghitabo unta pinaagi ini gihatagan og pagtagad ang maong problema.

DANGOG

Laing obserbasyon sa laing mall ug mao ni kasagaran nga problema. Kining manglimpyo nga di magbutang og signage nga dangog o magbantay kay dangog. Daghan ang mayandak labi na kay gigamitan og kemikal. Mao nga matag higayon nga magpasinaw mo sa salog libuti og yellow line ang inyong gitrabaho aron way maagrabiyado.