Sa madala lang

Dear Papa Joe, AKO diay si Janno, 25 years old, minyo, dunay usa ka anak. Nakapangutana lang ko sa akong kaugalingon nga sayop ba kaha ko nga nagminyo ko og sayo nga nahigugma na mi sa usag usa sa akong asawa?

Ang nahitabo gud kay wa ko magdahom nga matagamtaman nako ni kay sa una lihay kaayo ang mga babaye nako apan karon na hinuon nga minyo ko, mas daghan naman nga mga babaye ang moduol nako ug magpa- imply nga ganahan sila nako pero molikay ko. Apan naa toy mga panahon sa una nga makapatol ko pero wa mahitabo nga to the max gyud.

Usahay mas gwapa pa sa akong asawa ang moduol nako apan lagi kay may anak na man mi, maningkamot ko nga makalikay apan makapangutana sad ko at the same time kon ngano. Sa tinuod, kaya nakong likayan apan di nako malikayan. Ang pangutana kon ngano? Ikaw, Papa Joe, naa man gyud ka sa kahanginan, naka experience ka ba niini? Palihug pasabta ko. JANNO

Janno, Matod pa sa uban, ang tawo walay katagbawan apan alang nako naay disiplina. Normal ra na nga mo- appreciate ka pero kon mopatol ka, lahi na na nga estorya. Tinuod naa gyuy gitawag nga karmic reaction.

Siguro gikan ra na sa sud sa atong pagkatawo. Tungod sa guilt, mabulyaso na hinuon ta. Meaning malasmalason, matod pa nila. Magdepende gyud na sa tawo nga kamaong modala sa iyang konsensya, pabaga ba sa ato pa. Kay naa may mga tawo diha nga may kaya nga lahi lahi ang mga kabit, chicks, matrona ug cats pero maayo ilang kahimtang.

Well, kana sila naa gihapon nay time nga ang Ginuo ray nakahibawo, pero ang makonsensya kay sila ang nakahibawo nga naa ang Ginuo nagtan-aw. Ana man gyud nang tentasyon, kon naana ka sa sitwasyon, anha ka tintalon. Padayuna ang imong kalig-on kay naa kay pamilya. Hugti pa ang pagsalig nimo sa Ginuo. Daghang salamat. PAPA JOE