Don’t leave me alone
SA akong paminaw giwakli ko sa Diyos. Nia ko ron sa dako ug nindot nga balay. May duha ka suluguon. May kaugalingong awto. Pero wa koy kalipay. Si Mama Adela, si Papa Haron ug si Ate Sharon, namiya nako. Tua sila sa laing nasod, ug ako nia sa Cebu. Kalaay gyud, uy, sa akong sitwasyon.
Migawas ko sa balay. Miadto sa lawn. Gilingaw ko ang akong kaugalingon sa paglingkod sa swing ug sa pagtabyug-tabyog ani. Nakahunahuna ko pagtawag kang Bryle. Kon mawala sa hingpit si Bryle nako, hingpit na sab kong mag-inusara.
Nakadesisyon ko nga ipaubos ang akong pride. Gipagawas ko ang selpon sa bulsa sa akong walking shorts. Gitulpok ko ang mga numero sa selpon ni Bryle. Nagsigeg kiring ang selpon ni Bryle.
“C’mon, Bryle, tubaga na ko.” Hilom kong nakaingon. Pero nagsige gihapog kiring ang selpon ni Bryle. Hangtod nga ang operator na ang mitubag ug nag-ingon nga cannot be reached si Bryle. Nakapanghupaw kog sagunson. Gituyo kaha ni Bryle nga di ko tubagon? Nahunahuna ko nga may rason man sab siya nga mahiubos nako.
“May freedom pa ko, uy, nga modawat og suitor. Di pa man ta kasal.”
Nahinumdom ko sa akong giingon kang Bryle one month na karon ang milabay. Mora man gud og iya kong gisudyaan. Wa man koy dautang gibuhat. Nakigsulti lang ko kang Arnold sa sulod sa canteen sa university nga among gieskuwelahan niadtong higayona. Malipayon ko kay makakatawa man gyud ko sa mga jokes ni Arnold.
“Morag suod na man gyud kaayo mo si Arnold. Gisugot mo na tingali siya, no, Sofia, ug gihilom nimo ni nako?”
Makalagot ang pagduda ni Bryle nako. Wa siya motuo sa akong giingon nga wa ko sugta si Arnold. Dugay nang nangulitawo si Arnold nako. Una pa gani siyang nangulitawo kang Bryle nako. Pero inigsuon lang gyud ang pagbati ko kang Arnold.
“Naunsa ka, Bryle? Nganong wa man kay pagsalig nako? Nakalimot ka ba nga uwahi kang nangulitawo kay kang Arnold nako? Pero ikaw ang akong gisugot kay ikaw man ang akong love.”
Nakahilak gyud ko sa kahiubos kang Bryle. Gibiyaan ko siya. Wa ko huwata nga motubag siya nako.
Ug karon, morag naglikay na gyud si Bryle nako. Di na siya gustong makig-estorya nako. Wa na gani siya moteks nako. Nagtuo gyud siya nga boyfriend ko si Arnold.
Nakahunahuna na nuon ko sa pagsugot kang Arnold. (SUMPAYAN)