16-anyos nga dalagita gisuwayan sa paglugos
USA ka 16- anyos nga tinun-an sa high school nakalingkawas sa suway nga pagpanglugos sa usa ka panadero kagahapon sa alas 12:00 sa tungang gabii sa Barangay Guiwang, lungsod sa Alcoy.
Si Annabelle (dili tinuod ngalan), taga lungsod sa Dalaguete, suwerte human natabang sa iyang higala ug nadakpan ang panadero nga si Ignacio Declanan, 18, ulitawo ug taga Barangay Nug-as, Alcoy.
Si PO1 Dwight Medrano, desk officer sa Alcoy Police nga nahinabi sa dyss Super Radyo/ Sun.Star Superbalita, nagkanayon nga ang biktima nisuroy sa maong dapit ang biktima uban sa iyang barkada nga motambong sa disko atol sa piyesta sa pikas barangay.
Sa wala pa mahitabo ang krimen, ang biktima naglingkod sa lingkuranan sa usa ka vulcanizing shop sa dihang miagi ang suspek.
Gitimbaya niini ang suspek gipangutana kon duna ba siyay extra shorts nga wala magamit, diin mitubag sab kini nga wala.
Human niini, ang biktima milakaw agi sa likod sa maong vulcanizing shop aron moadto na siya sa diskohan, apan gisundan siya sa suspek ug gibunlot siya niini gidala sa kabatoan, gigakos, gidarok, dayon pusganong gihubo ang blouse niini.
Ang biktima nakahimo sa pagkisikisi nangayog panabang sa iyahang higala nga naabot sab gilayon hinungdan nga nikaratel sa pagdagan ang suspek.
Akto nga may mga sakop sa Alcoy Police nga nagpatrolya gitug-an nila dayon nadakpan sa hot pursuit operation ang suspek.
Ang suspek, gitanggong sa kapulisan, niangkon sa krimen kay wala na siya makaagwanta natintal siya hinungdan nga nakahimog dautan.