Ang bitin sa janitor
GIKAN sa paglimpiyo, pagsilhig og sawog ug uban pang bulohaton sa usa ka janitor ngadto sa usa ka boxing world champion. Mao kini ang estorya sa kinabuhi ni Donnie Nietes.
Sa edad nga 11 anyos, nagsugod ang pagkahilig ni Nietes sa boksing sa iyang yutang natawhan sa Murcia, Negros Occidental. Matod ni Nietes nga nagpatrain siya sa iyang uyoan nga Jerson Nietes ug dihang high school na siya, nanimpalad siya sa Bacolod City. “Didto ko nag- start, nagduwaduwa ko og amateur like inter-barangay, inter-school ug inter-city,” matod ni Nietes, kinsa 31 anyos na sa pagkakaron.
Tungod sa iyang pangandoy, nagtinguha si Nietes nga makasulod sa bantugang ALA stable dinhi sa dakbayan sa Sugbo nga gipanag-iya ni Cebu boxing patron Antonio L. Aldeguer. Tuod man, nasulod si Nietes sa ALA stable niadtong 1999 apan dili usa ka boksidor, kon dili usa ka janitor sa worldclass nga ALA boxing gym. Gipasabot ni Nietes bisan janitor, iya kining gidawat gumikan kay ang importante kaniya nga makasulod lang siya sa ALA stable.
MODALIKYAT OG TRAINING
Samtang nagtrabaho siya isip usa ka janitor, modalikyat si Nietes sa pag-ensayo kauban ang mga boksidor sa ALA stable. Gipasabot niya nga matag human gyud sa iyang trabaho, mag- training siya nga kinaugalingon. Niaway na sab siya sa amateur niadtong higayuna. Niabot ang punto nga gusto na ni Nietes nga magtutok sa boksing aron ipadayon ang iyang pangandoy.
“Kadugayan mura’g kapoy na’g trabaho bitaw. Ni- decide na gyud ko nga moundang na’g trabaho, nag- turn professional boxer ko,” pasabot ni Nietes.
Apan iyang giklaro nga sa premiro niyang paghangyo sa ALA nga moaway sa professional, wala siya tugti maong nibalik na lang siya sa Bacolod City. Tungod sa iyang grabeng determinasyon, nibalik si Nietes sa ALA gym ug mas lawom ang iyang paghangyo nga magpasakop sa ALA stable. Ning higayuna, misanong na kaniya si Aldeguer apan wala pa siya gidawat isip usa ka ALA boxer. Si Nietes nagpasakop sa Nietes stable apan sa ALA gym siya nag- training. Sa banabana ni Nietes, mga 10 pa ka professional bouts ang iyang gisagubang una siya hingpit nga nahisakop sa ALA stable.
Malipayon kaayo si Nietes nga nasulod na siya sa ALA stable ug mas gidoble pa niya ang iyang kayod sa training. Ning higayuna, nagpanikad og samot si Nietes tungod kay niabli na og dako ang pultahan paingon sa iyang pangandoy. “Pagsulod nako sa ALA, napun-an gyud ang akong mag technique ug nadasig sab ko mentally kay ALA fighter nako. Na- develop sab ang akong skills,” batbat ni Nietes.
GITAWAG OG “AHAS”
Inanayng nakakulit og pangalan si Nietes. Sa iyang matag sugmak, nakakuha siya og atensyon nga usa siya ka potensyal nga mahimong world champion. Nakakuha sab og atensyon ang iyang pagdala-dala og dakong bitin ibabaw sa ring kon aduna siya’y away. Kini maoy hinungdan nga gianggaan siya og “Ahas.” Nganong magdala man siya og bitin ibabaw sa ring? Dihang usa pa ka janitor si Nietes sa ALA gym, usa sa iyang mga trabaho mao ang pagpakaon ug pag-atiman sa mga bitin nga binuhi ni Aldeguer.
Sa interbyu sa wikipedia, gipasabot ni Aldeguer nga si Nietes lang adunay kaisog nga molimpyo sa tangkal sa mga bitin bisan kapila na sab kini napaakan. Niabot ang panahon nga nahimo nang higala ni Nietes ang mga bitin. Gikonsiderar ni Nietes nga suwerte alang kaniya ang higala niyang mga bitin.
NAHIMONG WORLD CHAMPION
Niadtong Septiyembre 30, 2007, niabot ang oportunidad nga dugay nang gihuwat ni Nietes – ang pagpanuktok alang sa world title. Wala niya usiki ang maong kahigayunan ug gilupig niya ang niadtong higayuna wala’y pildeng si Thai Pornsawarn Kratingdaenggym pinaagi sa unanimous decision sa Waterfront Hotel sa Lahug, Cedbu City aron angkunon ang bakanteng World Boxing Organization (WBO) minimumweight title.
Human sa upat ka mga malampusong depensa, nibug-at na si Nietes ug nakadesider ang iyang kampo nga mokampanya na siya sa junior flyweight division. Human lang sa usa ka tune-up bout, nakalangkat na sab og world title si Nietes sa bag-o niyang timbang pinaagi sa paglupig kang Mexican Ramon Garcia Hirales pinaagi sab sa unanimous decision sa University of St. La Salle Coliseum sa Bacolod City. Nadepensaan ni Nietes ang WBO junior flyweight title sulod na sa tulo ka mga higayon. Karong Mayo 10, 2014, depensaan kini’g balik ni Nietes batok kang Mexican Moises Fuentes sa SM Mall of Asia Arena sa Manila. Kini maoy ikaduhang away nila ni Nietes ug Fuentes. Ang premiro nilang away miresulta sa kontrobersyal nga majority draw. Importante kaayo kining awaya alang kang Nietes gumikan kay posibleng luna sa kasaysayan ang nag-atang kaniya kon molampos siya.
Aduna’y dakong poruhan si Nietes nga matupngan ang dugay nang rekord ni anhing Gabriel “Flash” Elorde nga nagpabiling world champion sulod sa pito ka mga tuig. Si Nietes sulod na sa unom ka mga tuig nga naggunit og world titles sa duha ka weight categories.
Naggunit og 32-1-4, 18KOs nga rekord, si Nietes gikonsiderar na karon nga usa sa dekalidad nga nahimong world champions sa Pilipinas ug kon asa pa man moabot ang iyang boxing career, kauban niya ang iyang pinanggang mananap- ang bitin sa janitor.