Series tapuson sa San Mig
ANG pagtapos sa semifinals series maoy misyon sa San Mig Coffee Mixers karong gabii batok sa di usab ka kompiyansaan nga Air21 Express sa Game 4 sa ilang best-offive sa PBA Commissioner’s Cup sa Araneta Coliseum.
Dala ang 2-1 nga bintaha, ang Mixers nga napukan sa Game One, mibangon sa Game Two ug Game Three aron pagtikang og laing ang-ang nga magdala unya kanila ngadto sa dalan diin naghuwat ang sayong finalist nga Talk ‘N Text Tropang Texters.
Ang import nga si James Mays maoy gilauman nga makahatag og saktong liderato sa mga batos ni coach Tim Cone nga suportahan usab nila ni PJ Simon ug Mark Barroca kinsa maayo usab kaayong nakaduwa sa Game 3 niadtong Sabado.
“One game at a time is an old cliché. But everyone says that because it’s true. We’ve put this one away and hopefully we can come out to also get the next game,” saysay ni San Mig Coffee coach Tim Cone.
Hinuon, kon buot hunahunaon, ang pressure anaa sa Mixers sanglit ang pagsulod sa Express sa semifinals wala damha ni coach Franz Pumaren.
Sa Game Three, ang pagkawagtang ni Sean Anthony maoy nakaparalisa sa opensa sa Air21 tungod kay ang depensa mahipunting na man didto sa ilang import nga si Wesley Witherspoon ug Asi Taulava.
“Without Anthony, there’s a lot of pressure on Witherspoon to carry the team. That allowed us to focus on him,” matod ni Cone.
Karong gabii, wa pay kasiguroan kon di pa ba gihapon makaduwa si Anthony.