1ST ROUND RA
Casimero mihagit ni Estrada
HUMAN matangtangi sa iyang titulo atol sa tinimbangay, kalagot ug kabangis maoy gipakita ni kanhi IBF junior flyweight champion John Riel Casimero niadtong Sabado batok sa mapangahason nga Colombian challenger nga si Mauricio Fuentes sa Pinoy Knockout sa Waterfront Hotel and Casino-Lahug, Cebu City. Sa pagbagting palang sa first round, daling milabyog usa ka ma makusog nga walop si Casimero nga maoy nakapakugang ni Fuentes.
Apan dili pa igo, dangtan lang og pipila ka segundos sunodsunod nga kombinasyon sa iyang mga kinumo maoy unang mipatikuko ni Fuentes kinsa nangahas pa sa pagbarog aron unta pagsukol.
Wa maglangan si Casimero ug wa usab niya papormahan ang Colombian fighter nga nagkabuang og panagang sa mga pag-atake sa lumad nga taga dakbayan sa Ormoc.
Katulo gyud ka higayon natumba si Fuentes ug sa dihang nabantayan ni referee Gerard White nga bangog na kining mibarog sa ikatulong higayon, giundang gilayon ang away.
Si Casimero gitangtangan sa iyang bakus sa wala pa ang away tungod kay sobra kini sa timbang og upat ka libras.
Sa kadaugan, si Casimero opisyal na nga misaka ngadto sa flyweight division ug sa post-fight interview gihagit sa 24 anyos nga fighter si World Boxing Association ( WBA) ug World Boxing Organization (WBO) flyweight king Juan Francisco Estrada.
“Gusto ko si Estrada (Juan Francisco), parang malaman kon sino sa amin ang magaling,” matod ni Casimero kinsa misaka na ngadto sa 20-2, 12 knockouts nga baraha samtang si Fuentes nahagsa sa 16-3, 12 knockouts.
Ang promoter ni Casimero nga si Sammy Gello-ani nakadayeg sa gipakita sa iyang batos ug iya karong lihukon nga matagaan niya og world title fight si Casimero ug posibli batok ni Estrada.
“He wanted to show everybody that he’s a champion,” matod ni Gello-ani. “(A fight with Estrada) We will make it possible. I know he can beat Estrada.”
Nabaniog ang pangalan ni Estrada sa mga Filipino boxing fans human kini maoy mipukan ni kanhi world champion Brian Viloria ug world prospect Milan Melindo.
Sa main supporting bout, pabilin nga wa pay pildi si Harmonito dela Torre (13-0, 8 KOs) ug nalangkat ang bakanting World Boxing Federation ( WBF) super featherweight crown pinaagi sa fourth round technical knockout batok ni Gadwin Tubigon (10-9-2, 5 KOs).
Si Tubigon napugos sa pagundang human magisi ang babawng bahin sa ngabil niini human mabundaki sa left hook ni dela Torre.
Ang kanhi amateur standout nga si Jack Tepora (10-0, 6 KOs) mipaundang usab sa journeyman Joas Apericio (11-12, 8 KOs) sa 10th round aron angkunon ang bakanting WBF Asia-Pacific super bantamweight belt.
Gilabni usab ni Jessie Cris Rosales (14-0-1, 5 KOs) ang WBO Youth AsiaPacific featherweight crown pinaagi sa unanimous decision batok ni Anthony Sabalde (8-4, 4 KOs).
Si Rey Labao (26-5, 17 KOs) nakasurvived human kini ma- knockdown ug mikulata ug mipasurender kang Rodel Wenceslao (7-8-1, 2 KOs) aron pagdepensa sa iyang RP lightweight strap.