Pacers, Clippers, Thunder miabante
GIPAHIMUDSAN sa Los Angeles Clippers, Indiana Pacers ug Oklahoma City ang ilang homecourt advantage sa ilang tagsatagsa ka Game 7 kagahapon aron makalusot sa second round sa NBA playoffs.
Ang Los Angeles mipildi sa Golden State 126-121, gipatugpa sa Pacers ang eight-seeded nga Hawks, 92-80, ug nabungog usab ang Memphies Grizzlies sa lanog sa Oklahoma City Thunder, 120-109.
Si Blake Griffin mipaksi og 24 puntos alang sa Clippers, midugang og 22 si Chris Paul ug 14 ka assist samtang laing 22 usab gikan ni Jamal Crawford nga maoy naghatod sa Clippers ngadto sa ilang ikatulong kadaugan sa playoff series sulod sa 38 na ka tuig. Kini ilang nabuhat taliwala sa pay kasiguroan kon unsay umaabot nga mahitabo sa team nga posibling igbabaligya human sa pagpahamtang og lifetime ban sa tag-iya niini nga si Donald Sterling tungod sa racial discrimination nga pamahayag.
Ikasangka sa Los Angeles ang Oklahoma City sa second round diin ang Thunder maoy unang mohost ugmang adlawa.
Miyagyag si Stephen Curry og 33 puntos ug siyam ka assists samtang si Draymond Green midugang og 24 alang sa Golden State.
Didto sa Indiana, si Paul Georbe mipuga og 30 puntos nga maoy iyang playoff career aron pangulohan ang Pacers sa pagpukling sa Atlanta.
Nakaipsot ang Indiana sa hapit nga pagkataktak na unta niini sa ikaduhang higayon sulod sa tulo ka adlaw. Kini maoy unang higayon nga ang starters sa Pacers nakapugnit og back-to-back nga kadaugan sukad niadtong tungatungang bahin sa Marso.
Mobalik sa ilang kaugalingong korte ang Pacers ugmang adlawa ug ning higayona ang nagpaabot nga Washington Wizards mao na usab ang ilang ikaparang.
Si Kyle Korver miyagyag og 19 puntos, samtang si Jeff Teague mikulit og 16 alang sa Atlanta.
Ang 24-6 nga rally maoy naghatag sa Indiana og 57-40 nga labaw sa third quarter. Si Roy Hibbert mipakli og 13 ug pito ka rebounds alang sa Pacers.
Sa ilang bahin, ang panagparis nila ni Kevin Durant ug Russell Westbrook maoy lig-ong hinagiban aron ilang mahatod ang Thunder ngadto sa second round.
Si Durant adunay 33 puntos samtang si Westbrook naka triple-double usab nga may 27 puntos, 16 ka assists ug 10 ka rebounds.