NEGUSYANTE, PULIS NAILAD

Sa nagpailang kura paruko sa Argao; naka-load og P15 mil, giandaman og mga pagkaon

LALAKING nagpailang kura paruko sa Argao, Sugbo nakailad sa usa ka opisyal sa kapulisan ug duha ka mga negusyante sa mao nga lungsod.

Nakakakuha og mga P15,000 nga balor sa load sa cell phone ug giandaman pa og panihapon alang sa 25 ka mga tawo ang mangingilad nga nihimo sa iyang modus pinaagi lang sa tawag sa cell phone niadtong Lunes sa udto.

Si SPO4 Esteban Albuera, deputy police chief sa Argao, maoy unang nakadawat sa tawag sa nagpailang nga si Msgr. Camilo Alia, kura paruko sa usa sa mga parokya sa Argao, dihang nanawag sa police station.

Si Albuera nga nahinabi sa Sun.Star Superbalita

nagkanayon nga mga alas 12:30 sa udto niadtong Lunes nitawag ang usa ka lalaki sa ilang police station ginamit ang cell phone.

Naniudto na sila niadtong higayuna sa ilang kusina sa police station dihang iyang gitubag ang tawag.

Nipaila kini kaniya nga si Alia, bag-ong kura paruko sa Argao ug nangita sa ilang hepe nga si Sr. Insp. Alejandro Batobalonos.

Apan gitubag niya nga wa si Batobalonos, kay naay importanting gilakaw sa dakbayan sa Sugbo hinungdan nga nangita sa deputy.

Gitubag niya nga siya ang deputy ug sila ang nagka-estorhanay.

Ang mangingilad namalihug kaniya sa pagpa-reserve og pagkaon sa Carmen Karenderya sa Brgy. Poblacion nga alang sa 10 ka mga tawo.

Nagtuo gyud siya nga si Alia ang iyang gikasulti mao nga wa siya makabalibad sa pamalihug niini kay dunay mga bisita gikan sa kaulohan.

Nisulti kaniya ang mao nga lalaki nga naa sila sa lungsod sa San Fernando, uban sa mga mga bisitang pari gikan sa Manila kay nagpahigayon silag parish pastoral dinner.

Anha sila mangaon sa Carmen Karenderya human sa ilahang lakaw sa Sibonga, San Fernando, ug Carcar.

“Nagtuo man gyud ko nga si Monsenyor Alia ang mitawag. Pari gud na, so ako wala maglangay, nagdala ko sa patrol car, miadto sa Carmen Karenderya. Akong gisultihan si Mirasopl Reyes anak sa tagiya,” dugang ni Albuera.

Gipahibawo niya si Mirasol nga nitawag si “Alia” kay dunay mga bisita ug gusto nila nga anha manihapon sa lugar.

Wa siya maglangay mi-text gilayon siya kang “Alia” nga naa na siya sa maong dapit, kinsa mitawag gilayon kaniya.

Gihatag niya ang cell phone ngadto kang Marisol ug sila nang duha nagestoryahanay ug nabantayan niya nga ang anak sa tag-iya dunay mga numero nga gipangsuwat.

“Ako nagtuo man gud nga si Monsenyor to. In good faith ko. Pinaingon pa siyang ‘Thank you deputy’. Akong giingnan ang tag-iya nga sori gyud, Mam, nailad ta,” matod ni Albuera.

Si Marisol nibutyag nga nadala ang P8,000 nga kantidad sa load kay nagsige og pa-load niya ang nagpailang ilang kura paruko samtang nagsigeg tawag kay tingbon niya sa pagbayad dungan sa pagpa- reserve sa panihapon alang sa 10 ka mga bisitang pari.

Gilakip pa kunohay sa pagpanihapon ang ubang mga personnel sa kapulisan sa Argao.

Apan naabtan na lang sa alas 6 sa gabii niadtong Lunes, way nitunga nga nga mga bisita.

Nabulabog sila human si Alexia Gonzales, tag-iya sa Alex Cafe nga duol sa police station, nagpa-blotter.

Nialigar si Gonzales nga susama gihapong modus nagpailang si Alia, nagpa-reserve nilag 15 ka tawo alang sa panihapon unya nagpa-load og mokabat sa P7,000 sa cell phone.

Si Kapitan Dario Canada, sa Barangay Poblacion gitawagan sab sa nagpailang pari kay nangayog assistance kay dunay duha ka mga langyaw nga dad-on sa Alex Cafe hinungdan nga siya niabag niini.

Wa siya masayod nga ilad na diay kadto.