Mga bugalbugalon

USA ka multicab ang pamilya sa managtiayong Nito ug Nida nga mibisita sa milagruso nga

shrine sa San Sebastian Parish sa lungsod sa Waliwali. Nanganaog dayon ang mga anak sa managtiayon nga sila si Archie ug Betty pag-abot nila sa plasa atubangan sa simbahan. Misunod ang mga ig-agaw ni Nida nga sila Helen ug Almira ug ang iyang bana nga si Charlie. Nanaog sab si Lilia, asawa ni Hector, family driver sa managtiayon. Wala manulod sa simbahan sila si Nito, Charlie ug Hector. Namalit silag beer Grande sa tindahan di layo atbang sa simbahan. Nanghulam silag baso sa tindahan ug nanglingkod sa plasa sa simbahan. Nagsugod sila pag-inom ning mga alas tres sa kahapunon sa adlawng Sabado.

Dunay miduol nila nga usa ka batan-ong lalake nga migawas gikan sa kombento. “Sir, di ra ba painuman dinhi, kay sagrado ning lugara,” matod sa batan-on nga mibarog kilid sa gilingkuran sa tulo.

“Kana ra bang lugar nga may gidili, kinahanglan gyud butangan og abiso. Sama sa ‘gidili ang pagpangihi’ o ‘gidili ang paglabay og basura.’ Hain man ang abiso dinhing dapita nga ‘gidili ang pag-inom?” matod ni Charlie ngadto sa batan-on. Manghod sa singka iyang tunada.

Nakapanglad-ok sa laway ang batan-on. Mitalikod kini nga namulong, “Huwat lang mo diha kay ang pari na lay akong pabadlungon ninyo.” Matod sa batan-on nga midali pagbalik sa kombento.

Nagtinan-away sila Hector ug Nito. Daw nahadlok sila nga pari ra gayuy mobadlong nila.

“Ay lang mog tingog. Akoy bahala kon moabot na ang pari,” ni Charlie nga may pagka abugaduhon ug may pagka pilusupo. Nagpadayon sila pag-inom nga naglingkod sa dakong lingkuranan sa plasa sa simbahan.

Puro dunay gipangayong milagro sila si Helen ug ang mga asawa sa tulo nga nag-inom. Si Almira dunay heart palpitation nga mosuol hapit kada bulan. Dako silag gasto sa ospital kay kinahanglang i- admit man gyud siya inigsuol ini. Si Nida dunay gimulo sa iyang matris. Nagduda sila nga mayoma. Si Lilia dunay anak nga gi- dengue ug naadmit sa ospital. Si Helen may anak nga bag-o lang nakagawas sa ICU ug may gi-mentin nga mga tambal kay diabetic.

Kadaghanan nila kawani sa munisipyo sa ilang lungsod. Si Nito naa sa opisina sa Tasador. Si Charlie naa sa opisina sa Tesorero. Si Nida naa sa Post Office. Wa sila maglisod sa kuwarta, apan may mga problema sa panglawas, gawas nilang Nito, Hector ug Charlie.

“Maayong hapon ninyo, Brod!” matod sa hamtong nga tawo nga miduol sa pundok gikang nigawas sa kombento.

“Maayong hapon sab,” hapit magkadungan pagtubag ang tulo.

Miundang pagtagay si Hector kay siya may ‘gunner.’ Turno na unta ni Charlie pag-inom. “Taga diin man diay mo?” matod sa tawo. “Taga dinhi ra ming lungsora, Brod,” ni Charlie. “Taga baryo Yagna lang mi.”

“Ako si Fr. Daniel. Duna man mi patakaran sa simbahan nga dili puwede inuman dinhing dapita. Sagrado man ning lugara,” sa pari sa malumong tunada.

“Dili man ni bino among giinom, Padre. Beer man lang ni,” ni Charlie. “Bisan na. Makahubog man gihapon na,” sa pari. “Hain may isog, beer o bino? Di ba mas isog ang bino?” ni Charlie. “Natural,” sa pari. “Hain may balaan, ang plasa o ang altar sa simbahan?” ni Charlie. “Ang altar gyud!” sa pari. “Wa kaha ka masayop sa imong patakaran, Padre, nga gidili man nimo ang pag-inom og beer dinhi sa plasa, unya ikaw mismo moinom og bino sa altar mismo sa simbahan?” ni Charlie nga misinyas kang Hector nga pun-on ang iyang tagay.

Nanglipaghong ang pari nga mitalikod. Way panamilit nga mibalik sa kombento. Gipangulbaan sila si Nito ug Hector kay basig tungluhon sila sa pari.

Si Charlie na lay nangunay pagtagay sa baso. Unya wa damha mikalit lag kabuak ang baso ug ang botelya sa Grande. Napusgay ang bildo sa baso ug botelya sa atubangan nilang tulo. Puwerting igkinga nila. Mibuhagay ang beer ngadto sa yuta. Nakapanguros silang tulo. Ug hilom nga nangayog pasaylo si Charlie sa Ginuo tungod sa iyang pagbugalbugal sa pari.

(KATAPUSAN)