KAAGI SA 'GWAPA'

Ama-ama, iyaan miasoy sa gidak-ang pamilya ni `Josephine’

NGANONG nagpabadlong sa iyang pamilya ang “gwapang babaye” nga nag- trending sa social media tungod sa iyang gipangbuhat?

Gikan sa wa niya pagbayad sa iyang gikuhang mga sapot sa usa ka boutique ngadto sa labing uwahi nga pagtabla niya sa bayranan sa usa ka resort sa Asturias.

Di ba kini siya sama sa ubang mga sakop sa adunahang banay nga “spoiled” mao nga nagpabadlong?

Aron pagtubag ning mao nga mga pangutana, giinterbyu sa CCTN Channel 47 ug Sun.Star Superbalita ang ama-ama ni Josephine ug nibarog nga guardian nga mao si Southern Leyte Provincial Board Member Daisy Gamale.

Ang mga ngan sa ama-ama ug tinuod nga pangan ni Josephine gipugngan ning mantalaan.

Base sa ilang gibutyag, si Josephine produkto sa broken family.

Ang pagka-mestiza ni Josephine iyang nakuha gikan sa iyang inahan nga dunay dugo nga German.

Naminyo ang inahan ni Josephine sa iyang ama-ama nga mabdos na daan sa 16-anyos na karon nga dalaga.

Buot ipasabot, ang iyang giilang amahan nga maoy nagmatuto kaniya sukad siya masuso pa, di maoy tinuod niyang amahan.

Ang iyang inahan ug ama-ama nakabaton og mga anak.

Sa pangidaron nga 5-anyos, nagkabuwag ang iyang inahan ug ama-ama.

Didto na siya nidako sa kiliran sa iyang ama-ama uban sa lain pa niyang mga igsuon samtang ang iyang inahan nilalin sa Manila ug didto na nagpuyo.

Wa madala sa inahan si Josephine tungod kay wa may ikabuhi sanglit matod pa nagumon sa ginadiling drugas.

Gihulagway ni Gamale nga suod si Josephine sa iyang inahan.

Bisan nga nagkabuwag sila sa iyang inahan, naghandom pa gihapon kini nga magkakita sila pag-usab.

Paglabay sa pipila ka mga tuig, sa dihang nagpagidaron na si Josephine og 14 anyos, nibalik ang iyang inahan sa Southern Leyte ug giagni siya nga mokuyog sa kaulohan.

“Morag fulfillment sa iyang damgo sukad pa sa pagkabata niya nga magkita silag usab sa iyang mama, magkakuyog sila. Mao tong lipay kaayo ang bata,” matod ni Gamale.

Kini ubos sa pasalig nga mas maayo pa unya ang iyang pagpuyo sa Manila tungod kay adunahan sila didto.

Samtang adunay makatabang kaniya nga mamahimo siyang artista tungod sa iyang kaanyag ug dako ang ilang balay.

Gawas sa dakong balay, aduna na usay mga kabtangan nga ubos nang daan sa iyang ngalan ug magpuyo kini nga susamag prinsesa.

Sa kalinghod sa pangidaron ni Josephine, siya nadani ug mas gipili nga mokuyog sa iyang inahan ug gibiyaan ang iyang ama-ama nga maoy nag-atiman kaniya.

Apan, matod sa iyang ama-ama nga nahinabi sa Sun.Star Superbalita, nahugno ang kalibutan ni Josephine tungod kay gawas nga squatter’s area ang nahimutangan sa balay, nag-atop lang og karton nga hapit anaa sa karsada matulog uban sa lain pa niyang mga igsuon nga anak sa laing lalake.

Wa usab matuman ang tanang pasalig nga siya maartista.

Didto na nagsige kinig away sa iyang inahan ug gusto nang mobalik sa Letye.

Nasayran sa Sun.Star Superbalita nga ila na usab kining gi- rescue sa kaulohan tungod kay mao gihapon nga rason, nilayas ug nipuyo og hotel nga wa makabayad.

Sa dihang nahibalik kini sa Leyte, ilang nabantayan nga nausab na ang dagan sa panghunahuna niini ug daw kanunay mag-pantasya.

Gibutyag sa iyang ama-ama nga makadaghang higayon nga si Josephine adunay isulti kaniya nga magtuo siyang tinuod, apan iyang matugkad nga bunga ra diay sa hunahuna sa bata.

Ang mga ningbarog nga ginikanan ni Josephine sa Leyte dugay nang midangop og psychiatrist aron lang matambalan ang menor de edad.

Matod niya nga nibiya si Josephine sa ilang balay sa Leyte ug mianhi sa Sugbo human makadungog og estorya nga ania sa Sugbo nagpuyo ang iyang tinuod nga amahan.

Apan ila na lang nga nahibaw-an nga nalambigit na kini sa mga kontrobersiya.

Tungod niini, ang ama-ama ug si Gamale nanawagan sa publiko nga sabton ang 16-anyos nga dalaga tungod kay di lalim ang iyang giagian.

Samtang, ang abogado ni Josephine mikuwestyon sa pagdakop sa kapulisan sa iyang kliyente.

Nanawagan siya sa mga tigbalita nga hunongon na ang pagbutang sa tinuod nga pangan sa 16-anyos.

Si Atty. Rene Abcede Jr. nga nahinabi sa Sun. Star Superbalita nipahibawo nga usa sa ila karong gitinguha nga makapiyansa sa P40,000 ang dalaga aron makapauli na sa ilang probinsya samtang magpadayon ang husay sa kasong estafa.

Matod ni Abcede nga usa sa ilang kuwestyunon kon nganong gidakop ang ilang kliyente ug gipasanginlan nga wa makabayad.