50 ka tawo nakuyapan sa show ni Alden sa Cebu
GIKATAHONG daghan ang gipangkuyapan sa Kapuso Fans Day ni Alden Richards sa Mactan niadtong Biyernes sa gabii tungod sa grabe kadaghang tawo nga nihugop sa show.
“Wala pa moabot si Alden duna nay mga 20 ang nakuyapan. Paglugwa ni Alden, napun-an pa kay nag- wild na man ang crowd, maorag mga 50 gyud tingali to ka tawo ang nakuyapan. Ang uban man gud alas 3 pa lang sa hapon, nag-atang na didto,” butyag sa mga nakasaksi sa maong hitabo.
Sigon sa Corporate Communications sa GMA-7 mokabat sa 15,000 ka tawo ang nitan-aw sa Kapuso fans day sa Cebu.
“Duna gyuy usa didto nasamad kay nasangit sa railings, taasa lagi sa samad gikan sa bra hangtod sa iyang karsones,” paambit usab sa usa ka staff sa GMA.
Katulo na ning higayon nga naka- show si Alden Richards sa Cebu apan matod niya sa interbyu sa Superbalita nga karon pa lang siya kakita og ingon ato kabagang duot sa Cebuano crowd sa iyang show.
Atangi ang interbyu ni Alden Richards nga mogawas sa “Super Ka!” karong Miyerkules kay siguradong malingaw mo sa iyang rebelasyon sa nagkasikat nilang loveteam ni YayaDub kun Maine Mendoza. Unsa nay real score nila karon? In love na ba siya ni YayaDub? Abangan!