MIKATKAT SA POSTE KAY `DUNAY MOPATAY’
6 KA ORAS. Si Jason (tinuod nga ngan gipugngan), lumad nga taga Aloguinsan, mikatkat sa usa sa mga poste sa center island sa N. Bacalso avenue, Siyudad sa Sugbo mga alas 11 sa gabii niadtong Dominggo. Nikanaug siya mga pasado alas 5 na kagahapon sa buntag.
LALAKENG nahadlok kay dunay tawo nga mopatay kaniya nisaka sa poste sa kuryente ug traffic light sa mga eskina sa N. Bacalso Avenue ug dan Tres de Abril, Dakbayan sa Sugbo.
Nilanat og dul-an sa pito ka oras una pa nakombinser si Jim (di tinuod nga ngan), 24, taga Aloguinsan, Sugbo, sa pagkanaug sa poste human matuman ang iyang hangyo nga dunay mga tigbalita nga mag-atang kaniya.
Ang drama nagsugod alas 11 pa sa gabii niadtong Dominggo ug mikanaug pasado alas 5 sa kadlawon, kagahapon.
Si Jim nga nagsul-ob lang og brief nikanaug inabagan sa aerial ladder sa Bureau of Fire Protection.
Usa ka sakop sa media nga si Rowena Capistrano nikumbinsir kang Jay sa pagkanaug ug pangitaon ang iyang igsuon nga taga Pilit, Cabangcalan, siyudad sa Mandaue.
Nisakay og de pasaherong bus si Jim gikan sa ilang lungsod, apan gipakanaug sa bus paghiabot sa maong lugar kay di na masabot ang iyang sinultihan ug linihukan.
Samtang nagdagan ang bus paingon sa siyudad sa Sugbo, kanunay magpanghadlok si Jim kay matod niya dunay tawo nga nagsunodsunod kaniya ug gustong mopatay.
Sa iyang pagkanaug sa bus, nituyo siya sa paghubo sa iyang pantalon ug unang misaka sa poste sa traffic lights nga anaa sa intersection gamit.
Di pa igo, mikalit kini og layat dala ang pagsipit sa iyang paa sa poste sa kuryente nga anaa ra sa tupad.
Una siya nga nangita sa iyang igsuon ug pagkahuman sa mga sakop sa media.
Nianang kaadlawon, nangabot ang mga sakop sa media ug siya gipasaligan nga ihatud sa iyang igsuon una pa siya nikanaug sa poste inabagan sa BFP.
Unang gidala si Jim sa Police Station 6 sa San Nicolas ug wa magdugay gihatod ngadto sa iyang igsuon sa Cabangcalan, Mandaue City.