Way basehanan ang pagsupak

GISUSTINIHAN sa pipila ka mga opisyal sa barangay nga sakop sa Team Rama ang baruganan nga di mouli sa mga luhong sakyanan. Ang ilang punto nga gikinahanglan ang mga sakyanan alang sa ilang pagserbisyo sa ilang mga constituents ug politika lang ang nagpaluyo sa gibuhat ni acting mayor Margot Osmeña.

Apan klaro man nga palusot lang kining maong rason kay wa na man panggamita ang maong mga sakyanan. Ug ang gipang-imbentaryo gianamna man sa pag-uli o gi- assign sa mga opisyal nga nagkinahanglan niini.

Sa panahon ni Mayor Mike Rama, klarong ang iyang mga tigsuporta lang ang naay mga luhong sakyanan. Duna pay nagdoble.

Kon buot hunahunaon baya, kining wa pag-uli sa mga sakyanan walay laing basehanan gawas sa politika.

Igo ra man gud gipagamit ang maong mga sakyanan ug kon bawi-on kini, angay lang mauli dayon. Dili baya ngilad ang hinungdan sa mando nga bawi-un kay igo ra man kining ipaimbentaryo. Lahi na gud ang liderato sa Syudad sa Sugbo.

Apan way planong mosuporta sa bag-ong liderato sa mga Osmeña kining mga kapitan sa Team Rama.

Hulga sab kining gibuhat ni acting mayor Margot Osmeña kay klarong wala makapangandam ang kampo ni Rama.

Napildi man tuod sa miaging piliay si Mayor Mike Rama apan nagtuo sila nga duna pay panahon nga makapangandam sa dili pa ang Hunyo 30, 2016.

Nakahibawo na man kita nga lahi ang nahitabo. Nasuspenso ang Rama, nahimong acting mayor si Margot, ug sunod-sunod nga gipang-utingkay ang kahimtang sa pinansya sa City Hall.

Tuod man, anam-anam nga naukay ug nabulgar ang tinuod kahimtang sa pinansya sa City Hall.

Ang paagi lang gyud nga mabaraw kining maong proseso sa pagkabonggo sa mga kalaki sa panahon ni Mayor Rama mao kining pagsuberbiyo sa mga kapitan ug paghimo og bag-ong mga isyu sama sa giingong kidnapping ni Labangon Barangay Councilor Rodolfo Tabasa.

15-30

Laing isyo nga giisa aron mabaraw ang pagkabonggo sa kalaki sa miaging administrasyon mao kintahay kining giingong masaker sa mga job order employees sa City Hall.

Apan masaker ba kon undangon ang pag-usik-usik sa pundo sa syudad pinaagi sa pag-undang sa sweldo alang sa mga empleyado nga 15-30?

Masaker ba kon undangon ang way hinungdang pagserbisyo sa mga tawong way buhat gawas sa pagdawat lang og sweldo?

Dayon, itubag sa mga dumadapig ni Rama nga kini na sab ang buhaton sa administrasyon ni Osmeña.

Buot ipasabot sa kampo ni Rama nga ngil-ad ang pagpanaktak kon ilang tigsuporta ang maigo bisan og kining mga tawhana walay trabaho gawas sa pagdawat lang og sweldo?

Kon maghisgot kita kabahin sa mga department head nga gitangtangan sa katungdanan sa wala pa ang Hunyo 30, di ba kaha nga wala sila makauyon sa nahitabo kay wala na silay panahon sa pagtabon sa angayang mga tabonan?

Sa pagkakaron, nanggawas na ang daghang mga gipangdisallow sa Commission on Audit (COA) ug wala nay mga department head nga modupa sa miaging administrasyon.

Di na sab makatubag pagtarong si Rama kay wala na may gahum ang iyang mga sinaligan.

Tungod niini, nasakit pagmaayo ang kampo ni Rama. Apan unsa may ilang mahimo gawas sa pag-isa na lang sa mga way hinungdang mga isyo? Ang nakaapan lang niining maong stratehiya kay dali kaayo matapi ang ilang mga ataki pinaagi sa mga mabisto nga mga anomaliya.

May pa og magpadaplin na lang sila aron dili pa maangin sa mga umaabot nga mga makit-ang mga binuang sa miaging administrasyon.