Special police groups balik na sa ilang trabaho

BALIK na sa ilang naandan nga trabaho ang Regional Anti Illegal Drug Special Operation Task Group-7 ug Regional Special Operations Group nga gibungkag niadtong milabayng mga semana human gipang hulipan ang tanang personnel niini.

Si Chief Supt Noli Taliño, direktor sa Police Regional Office 7, nagkanayon nga bag-o na ang mga tawo sa maong mga buhatan nga gipangulohan ni Supt Joel Quintero nga gikan sa Criminal Investigation and Detection Group sa rehiyon 2 ug siya usab ang Deputy Chief sa Regional Intelligence Division-7.

Matod ni General Taliño nga ang RSOG ug RAIDSOTG usahon na kini ug ubos sa pagdumala sa Intelligence Division aron usa nalang ang ilang sundon nga kamandoan.

Bisan ug bag-o pa nga gibuksan ang duha ka special unit duna na dayon kini mga target nga naglangkob sa top 10 bigtime drug personalities sama sa drug lords nga naglihok sa tibuok rehiyon 7.

Lakip sa ilang gi monitor ang posibling shabu laboratory nga naa dinhi sa Central Visayas.

“Sa ngayon wala pa kaming na uncover na mga shabu laboratory dito sa Region 7 sana wala but that’s part of our monitoring yung mga big time drug lords,” matod ni Taliño.

Dili lang ang RSOG ug RAIDSOTG ang mohimo ug anti drug operation ang gitahasan ni General Taliño kon dili apil na usab ang mga police stations nga motrabaho sa ilang mga target.

Dako ug pagsalig si Taliño sa mga bag-ong personnel sa RSOG ug RAIDSOTG. Ang uban niini gikan sa Special Action Force (SAF) sa Kaulohan samtang ang uban gikan sa Provincial Intelligence Branch sa probinsya sa Sugbo nga duna nay gipakita nga agi nga gipangulohan ni SPO1 Reynaldo Solante. Sa kasamtangan adunay 26 ka mga personnel sa pagkakaron ang RSOG ug RAIDSOTG-7.

Matod ni Supt Joel Quintero nga mangita pa sila ug idugang apan kinahanglan nga mapaubos kini sa training sa Special Weapons and Tactics (SWAT).

Iyang giangkon nga duna na silay mga target nga mga dagkong personalities nga maoy sunod nilang himoan ug aksyon.

Matod niya nga kung dunay top 10 nga big time drug lords nga naglihok sa Central Visayas duna say mga dagko pa niini nga maoy mihulip sa operation sa Sugbo human mamatay silang Jeffrey Diaz alyas Jaguar, Rowen Secretaria alas Yawa ug Alvaro Alvaro alyas Barok.

“May mga malalake tayong target na mas malake pa sa top 10 most wanted nuon,” matod ni Supt. Joel Quintero.