4 PATAY SA 2 KA ORAS
2 sa vigilante sa Cebu City; 2 sa pulis sa Lapu-Lapu
SUD lang sa kapin sa duha ka mga oras, upat ka mga tawo nga giingong nalambigit sa ilegal nga drugas ang napatay, duha niini sa gituohang vigilante style killing samtang ang duha sa police anti drug operations sa Metro Cebu.
Sa Dakbayan sa Sugbo, tulo ang gipamusil sa gidudahang mga vigilante, duha niini nangamatay.
Mga biktima nga nangamatay giila sa Homicide Section sa Cebu City Police Office nga sila si Dario Paez, 49, taga Lower Kulbeta, taga Brgy. Mambaling, ug Edwin Casinillo, 49, taga sityo Lawis, Brgy. Lorega San Miguel.
Ang naa sa kritikal nga kondisyon sa pagsuwat ning taho giila sa kapulisan nga si Erwin Quijano, 46, taga dalan Salvador, Labangon.
Matod sa kapulisan nga pasado alas 10 sa milabay nga gabii, diha sulod sa ilang balay si Quijano sa dihang gisulod og usa ka tawo ug gipusil makaduha ka mga higayon.
Ang wa mailhi nga gunman daling nisibat samtang si Quijano daling gidala sa tambalanan.
Matod sa uyoan niini nga di gustong nganlan nga naa sa kritikal nga kondisyon ang iyang pagumangkon kagahapon sa hapon.
Si Quijano ika 12 sa listahan sa Punta Princesa Police Station nga nalambigit sa drugas.
Usa ka oras ang nakalabay, lain na usab ang gipusil sa sityo Kulbeta, Barangay Mambaling.
Si Paez nga bag o lang nitahan sa kapulisan naglingkod daplin sa dalan dihang giduol sa duha ka mga tawo nga luwan sa motorsiklo.
Si Paez gipusil makalima ka mga higayon sa ulo ug ubang bahin sa lawas gamit ang kalibre .45 nga pistola. Siya namatay dihadiha.
May nakakita nga ningpadagan sa interior portion sa Alumnos ang duha ka mga gunman .
Katapusan nga gipusil mao si Casinillo pasado alas 12 sa tungang gabii sa sityo Lawis.
Si Police Chief Inspector Dexter Basirgo, hepe sa Parian Police, nakadawat og alarma nga adunay gipusil sa mao nga dapit.
Sa ilang pagresponde, ilang nakitan si Casinillo nga nagbuyod nga may mga samad pinusilan sa kalawasan.
Tulo ka mga tawo sakay sa itum nga motorsiklo ang gitumbok nga mga mamumuno.
Matod ni Basirgo nga ila pang susihon kon anaa ba sa listahan si Casinillo.
Ilang nasayran nga nadakpan na kini sa milabayng mga buwan tungod sa drugas.
Sa Dakbayan sa LapuLapu, duha ka giingong drug personalities sa barangay Pusok, napatay sa kapulisan atol sa buy operation kagahapon sa kaadlawon.
Sila si Noel Bulalhug Quintero, alyas Bolantoy, 30 ug usa ka Junior Berdijo, pulos tagaSitio Santa Maria, Pusok ang nakalapas sa paghupot og illegal nga drugas ingon man ‘direct assault’ sa mga operatiba.
Mga alas 12:35 kagahapon sa kadlawon, ang mga sakop sa Police Station 5 inabagan sa Philippine Drug Enforcement Agency (PDEA)7 nipahigayon og buybust operation sa dapit human nakadawat og impormasyon nga nagpadayon og pamaligya og shabu sila si Quintero ug Berdijo.
Nasuta sab nga ang duha anaa sa level two drug pusher ug nalakip sa watch list sa mga drug personality sa police station level.
Positibo ang impormasyon sa duha human nibaligya si Quintero og pakete sa shabu sa pulis.
Apan nakabantay si Quintero nga pulis ang gikatransact, dali kining nibunot sa iyang giluklok nga armas sa hawak dayon nipusil sa pulis.
Giingong nitabang sab og pamusil si Berdijo hinungdan sa pinusilay.
Way naigo sa mga pulis nga dali nga ningbawos. Nangamatay dihadiha sila si Quintero ug Berdijo sa dihang nangaigo.