Ang mga Super Tree sa Singapore
KON mga maanindot nga talanawon lang ang hisgutan, di magpalupig niini ang nasud sa Singapore.
Usa sa mga gipanghambog niini nga atraksyon mao ang Supertree nga anaa sa Gardens By The Bay.
Kini dagsaon sa mga turista didto tibuok adlaw ug gabii.
Ang Supertree grove maoy usa sa Top 5 nga Landmark sa nasud base sa TripAdvisor’s 2016 Travellers Choice award.
Apan unsa may anaa niini? Ani ang unom ka butang nga angayan nimung mahibaw-an sa SuperTree sa Singapore.
1. Di kini kahoy apan mura kinig kahoy nga adunay gitas-on nga sama sa 16 ka andana nga edipisyo.
2. May 18 ka Supertree sa Gardens By the Bay nga may environmentally sustainability functions Dose sa mga Supertree anaa sa Supertree Grove samtang ang laing unom anaa sa laing dapit.
3. Napuno ang matag Supertree ug mga nagkadaiyang tanom. Gikataho nga di mominos 162,000 ka nagkalainlaing tanom ang nabuhi niini gikan sa orchid, ferns ug uban pa nga gikan pa sa laing nasud ang uban.
4. Solar-powered ang SuperTree, gawas niini, gigamit usab kini aron mosawo og tubig sa uwan nga magamit ra usab sa mga tanom nga anaa niini.
5. Ayaw palabya ang pagbisita niini panahon sa kagabhion tungod sa OCBC Garden Rhapsody nga light show samtang mopatukar sab og musika ang management niini.
6. Mahimo kang makalakaw nga mas duol sa mga Supertree pinaagi sa 128 metros nga skyway nga nagkonektar niini ug mokaon sa usa ka kan-anan nga anaa sa usa ka Supertree niini.
Kon mobisita kamo sa Singapore, ayaw ninyo palabya ang talan-awon nga di lang pangbarkada apan pangpamilya usab. Seguradong balik-balikan ni ninyo didto!