Bansayon pagpusil aron andam sa pagronda sa pushers
BANSAYON sa Special Weapons and Tactics ang bagong mga sakop sa Regional Special Operations Group ug Regional Anti Illegal Drug Special Operation Task Group aron mahimong hanas sa pagpusil sa ilang pagpangandam sa ilang subsub nga anti drug operations
Human mahimo na nga makaoperate ang gibungkag nga opisina sa RSOG ug RAIDSOTG7, kinahanglan pa sila nga bansayon sa Swat.
Matod ni Chief Supt Noli Taliño nga sa pagkakaron nga wa pa magsugod ang pagbansay, dugangan una sila og usa ka team sa Swat sa Regional Public Safety Battalion aron maoy moabag sa mga anti drug operation sa maong buhatan.
Usa sa mga tumong ni Taliño nga mabansay ang mga operatiba sa pagdasmag sa target sa kapulisan ug unsaon pagdepense sa kaugalingon kon ang subject mosukol.
Gisalikway usab niya ang pagduda nga himuong vigilantes ang maong mga pulis alang sa drug personalites nga maoy hinungdan nga bansayon og maayo.
“Kailangan talaga ito sa operation. Halimbaya notorious yung subject, kailangan natin ang special team na pumasok dito. Syempre pag lumaban, kailangan maunahan ng police natin,” matod ni Taliño sa mga tigbalita.
Siya niingon nga kinahanglan nga makamao motarget ug mobawos sa pagpusil ang mga sakop sa RSOG ug RAIDSOTG7.
Nagsagol na karon ang personnel sa duha ka special units sa PRO 7 diin dunay gikan sa Special Action Force sa kaulohan ug mga pulis gikan sa probinsya sa Bohol ug Sugbo nga nakaagi na og special training sa Swat, usa na niini si SPO1 Reynaldo Solante.
Mahimong sila na mismo ang maniid sa ilang subject ug sila na usab ang mopasaka og kaso ngadto sa korte.
Mahimo nga mosaka pa ang P300,000 nga naa sa PRO 7 alang sa paghatag og reward sa mga pulis nga makapatay og durugista.
Matod ni Taliño nga sa ilang listahan, dunay 4,000 ka drug pushers nga naglihok sa Central Visayas nga nabutang sa ilang priority list.
Saad niya nga ang matag usa ka pusher nga mapatay dunay madawat ang pulis nga P10,000 apan hisgutan pa kini sa ilang staff meeting.
Samtang nibahad si Taliño sa mga pulis nga nalambigit sa ilegal nga drugas nga mahimong mahisama sa usa ka senior inspector sa kaulohan nga napatay sa iyang mga kaubang pulis sa dihang gipaubos sa anti drug operation.