Negosasyon sa mipuga sa CPDRC pakyas: Toral

NAPAKYAS ang negosasyon tali sa tagdumala sa Cebu Provincial Detention and Rehabilitation Center (CPDRC) ug sa nipugang priso nga si Arnel Mait alang unta sa iyang pagtahan.

Nagmingaw ang CPDRC kagahapon human suspendido man ang dalaw mugna sa pagpuga ni Mait.

Tibuok adlaw niadtong Miyerkules ang nahimong negosasyon tali ni CPDRC consultant Marco Toral ug sa nipuga nga si Mait.

Nitabang sa paghangyo kaniya nga mobalik sa provincial jail ang iyang asawa.

Personal nga niadto si Toral sa lungsod sa Argao niadtong Miyerkules, diin giingong nagtagotago si Mait.

Aron mas madani nga motahan, gihatagan ug pasiunang P15 mil ang iyang asawa samtang nagpaabot kaniya. Dihang wala siya nitunga, gibawi ni Toral ang kwarta.

Usa sa mga rason nga nagdumili pa pagtahan si Mait mao ang tinguha niini nga manimalos sa usa ka pulis sa Argao, nga maoy giingong nakadakop kaniya kaniadto.

Tungod kay noshow si Mait, gitugyan na sa CPDRC officials ngadto sa kapulisan ang pagpangita kaniya.

Ang Argao police nipasalig na pagtabang sa paglocate kaniya aron madala siya ug balik sa provincial jail.

Si Mait ikaduha nang piniriso sa CPDRC nga nakapuga. Sa miaging tuig, nipuga ang usa ka Michael de la Rosa, nga hangtud karon wala pa gyud madakpi.

Nunot sa pagpuga ni Mait, gitinuod sa tagdumala sa provincial jail nga suspensohon ang pagdawat ug mga bisita. Gani kagahapong adlawa, schedule unta sa dalaw apan matod ni Toral, gipapauli nila ang tanang mga nagtinguha unta pagbisita.

Nasagmuyo ang mga piniriso sa pagsuspenso sa dalaw ug nanawagan sila kang Mait nga mobalik na aron mabalik na usab ang ilang prebilihiyo pagdawat ug mga bisita.

Ang inmates nga si Jimmy Berian miingon nga mas maayong mobalik na si Mait aron dili maamong ang ubang piniriso nga gusto sab makakita sa ilang mga kabanay nga modalaw kanila matag Huwebes, Sabado ug Dominggo.

Samtang giingong nagpabuto ug armas sulod sa CPDRC si Toral kagahapon.

Wa hinuon magduhaduha pagangkon niini si Toral tungod usab kay napuno na siya sa mga badlungon nga piniriso.

Kagahapon sa buntag giingong nabati ang kusog nga buto sa armas sulod sa opisina ni Toral. Kini human usab dunay 4 ka mga piniriso ang gitakalan tungod sa pagsige nila ug lapas sa mga lagda sa prisuhan.

Matod ni Toral, ang mayor de mayores sa CPDRC nga si Lito Granada, ang nihimo sa pagsilot sa maong mga piniriso tungod sa pagsige niini ug sugal sulod sa prisuhan.

Dugang niya, kadaghan nang gipasidanan ang maong mga inmate nga undangan kini apan wala magpatuo hinungdan nga siya na mismo ang nihatag ug warning kanila pinaagi sa pagpabuto sa iyang armas.

Hinuon, wala’y naangol sa nahitabong pagpabuto ug armas ni Toral sulod sa provincial jail.

Giklaro sab niya nga blank cartridge ang bala nga iyang gigamit, ug dili kini mahimong makapanakit o makapatay ug tawo.

Ang maong bala maoy sagad gamiton panahon sa 21 gun salute.

Sa salog usab giingong gitumong ang armas dihang iya kining gipabuto.

Una nang miingon ang Commission on Human Rights nga susihon ang nahitabong pagpahamtang ug silot pinaagi sa takal, diha sulod sa CPDRC.

Butang kini nga bukas si Gob. Hilario Davide III, dungan sa pagpasabot nga dunay kaugalingong lagda ang mga inmates sulod sa prisuhan.