Honorarium sa mga kawani sa barangay gipabalik ni Tomas

HINAYHINAY na nga nadawat sa mga empleyado sa barangay sa dakbayan sa Sugbo ang honorarium, sumala ni Cebu City Treasurer Tessie Camarillo.

Matod ni Camarillo nga pipila na ka mga barangay tanod ug lupon tagapamayapa sa dakbayan nakadawat na sa ilang honorarium alang sa buwan sa Abril.

Nasayran nga nahitabo ang paghatag sa mga honararium niadtong Lunes.

Dugang ni Camarillo nga human sa maong paghatag, giproseso na usab ang laing cash advance aron sa sunod semana makahatag na usab sila og suweldo dili lang sa mga tanod, lupon apan lakip na sa mga loader ug driver.

Gitataw niini nga matag semana kon unsay mosulod, buhatan dayon og cash advance sa ilang buhatan aron sa Lunes makasuweldo dayon sila.

Sagad sa mga ihatag nila nga honararium alang pa lang sa buwan sa Abril ug wala pay labot ang gikan sa buwan sa Mayo hangtod na sa buwan sa hunyo.

Gipasabot ni Camarillo nga aron maproseso ang paghatag sa allowances ang opisina nga maoy incharge niini mao ang magprocess sa ilang payroll ug isumiter sa accounting alang sa audit.

Kon mahuman na og audit sa accounting i- release dayon kini ngadto sa City Treasurer’s Office alang sa pagproseso sa cash advance sa kinatibukang kantidad sa payroll nga ilang nadawat gikan sa accounting.

Una niini, ang pagpanghatag og honorarium sa mga trabahante sa barangay gihunong ni Cebu City Mayor Tomas Osmeña kinsa nipasalig nga bayran sa siyudad ang allowance nila nga wala madawat sukad pa niadtong Abril hangtod na sa Hunyo.