Plastic ban sa Mandaue gihigpitan
MAS gihigpitan ang kampanya sa kagamhanan sa dakbayan sa Mandaue kabahin sa pagpatuman sa plastic ban ordinance sa dakbayan.
Kagahapon, ang City Environment and Natural Resources Office (CENTRO) nipahigayon ug usa ka forum uban ang mga tindera sa merkado kabahin sa striktong pagpatuman sa ordinasa.
Apan pipila ka mga nitambong ang nipadayag ug pagsupak niini atol mismo sa maong kalihukan tungod kay matod pa nila nga makahatag lang kinig kahasol nila ilabi na sa mga konsumidor nga mogamit ug plastic sa mga basa nga produkto niini sama sa isda.
Nasuta ning mantalaan nga sugdan na ug pagpanakop sa dakbayan ang molapas sa maong ordinasa sugod Agosto 1.
Sa kasamtangang, gilibot sa CENRO ang pipila ka barangay sa dakbayan aron mapasabot sa mga tindera, negosyante lakip na sa publiko ang unod sa maong ordinansa.
Si Aty Liser Malate, assistant legal officer sa dakbayan nagkanayon nga ilang gituyo ang pipila ka mga information drive sa mga pipila ka barangay sa dakbayan aron mapasabot sa katawhan ang importansya sa hugot nga implementasyon sa maong ordinasa.
Dugang niya dakong ikatampo sa ordinansa kon madisiplina ang mga tawong nagpasagad paglabay sa mga basura labi na sa mga plastic nisag-asa ilabi na sa mga kanal.
Kahinumduman nga giduso ni Mayor Luigi Quisumbing ang hugot nga pagpatuman sa plastic ban nga nahimong ordinansa sa dakbayan niadto pang 2010.
“Priority gyud ni nako, aron dili na mausab ang mga pagbaha sa siyudad nga moresulta sa pagkadaot o pagkaguba sa mga kabtangan.”