`Imbargotory’
NANINGIL na ang ubang mga barangay kapitan ngadto sa City Hall kon asa na ang ilang mga City Hall issued vehicles nga gipang- recall niadtong panahon ni acting mayor Margot Osmeña alang sa inventory. Ang ubang mga kapitan misuwat ngadto kang Vice Mayor Edgardo Labella aron magpatabang nga mabalik kanila ang maong mga sakyanan. Matod sa mga kapitan nga kon inventory lamang ang tumong sa City Hall, nganong hangtud karon wala pa man mauli ngadto sa ilang mga barangay?
Kaluoy sa mga kapitan labi pa sa mga kaalyado ni kanhi mayor Mike Rama. Nag- expect o nagdahum pa sila nga mauli ang maong mga sakyanan. Ayaw na mo pagdahum uy. Kay ang gihimo sa nag-ukupar karon sa City Hall dili inventory kon dili “imbargotory.” Gipang-imbargo ang maong mga sakyanan aron iyang lisud-lisuron ang mga kaalyado ni Mike. Kay kining tawhana iyang gipanggukod ug gidumtan ang mga supporter sa Team Rama.
Ningdangop kang Vice Labella ang maong mga kapitan. Aber, unsa may mahimo sa bise mayor nga naa pa man nang mayor? Wala man gani siya hatagi og sakyanan apil na ang mga konsihal sa Team Rama. Kanang iyang gihimo usab nga pag- recall sa mga ambulansiya ug nga mini-bus sa mga bukirang barangay alang kuno gihapon sa inventory, mao gihapon ang mahitabo ana. Dili na kana i-uli ngadto sa mga barangay kansang mga kapitan kaalyado sa Team Rama. Iya ganing gipangtangtangan og allowances ang mga barangay official ug mga barangay worker nga dako kaayo og natampu sa barangay.
Kining gihimo aning maong “kanhi laos nga pulitiko” dili na gyud makatarunganon. Migawas na ang iyang pagkamadinumtanon ug pagkamangginukdanon. Mora ni siya og usa ka tawo nga malipay magtan-aw nga nagkalisud-lisud ang mga tawo nga iyang gipanggukod. Iyang ikalipay ang kasakit ug kagulanan nga nasinati sa uban. Ug nagtuo kaha mo nga magbag-o ni siya bisan pa man sa balatian nga gihambin niya? Dili na. Lisud na kining bag-ohon ang kina-iya nga sama niini. Busa kamong iyang mga kontra sa pulitika mag-agwanta mo hangtod nga siya pay mayor. Kay alang kaniya, siya nay Ginoo.
Gipangimbargo ang maong mga sakyanan aron iyang lisudlisuron ang mga kaalyado ni Mike. Kay kining tawhana iyang gipanggukod og gidumtan ang mga supporters sa Team Rama