Legal na ang pagpatay?

SUD lang sa tulo ka mga oras, upat ka mga tawo nga giingong nalambigit sa gidiling drugas ang gipamatay. Duha niini sa Siyudad sa Sugbo samtang ang duha sa Dakbayan sa Lapu-Lapu.

Niadtong miaging gabii, tulo usab ka mga tawo sa Siyudad sa Lapu-Lapu ang gipamatay.

Ning pito nga nangamatay ning nakalabay nga duha ka mga adlaw sa Metro Cebu, duha lang ang tungod sa police operations samtang ang lima pulos vigilante style killings.

Hayan mayoriya sa publiko ang nangalipay kay ang gipamatay drug personalities sa ilang mga lugar nga nagpadayon sa ilang ilegal nga kalihukan.

Apan kon tan-awon og maayo, angay ikaalarma kining vigilante-stye killings tungod kay bisan mga durugista ang gipamatay, ilegal gihapon kini.

Duna kitay mga balaud nga gitamdan isip usa ka sibilisadong katilingban. Gigama ang balaud aron pagmintinar sa kahapsay ug kalinaw, hustisya ug pagpanalipod sa katungod sa matag tawo.

Gawas pa, segurado ba kaha nga ang pagpatay gitumong aron paglimpyo sa komunidad gikan sa dangan sa drugs o wa ba kaha kini sakyi sa mga drug syndicate nga nagbaslanay o nagpatak-om sa ilang mga sakop.

Wa ba kaha kita mobalik niadtong panahon nga di pa sibilisado, diin ang pagpatay normal nga buhat?

Di ba kuyaw nga maangin ang mga inosente kon sila maalaan?

Inay ikalipay, angay kini nga ikahadlok tungod kay maorag nahimo nang legal ang pagpatay, basta durugista lang ang gi- target.

Kini usab usab ka pagpangyatak sa balaud nga nanalipod kanatong tanan, inosente o kriminal.