National ID system

DAKU akong uyon sa awhag sa mga senior citizen ug people with disabilities (PWDs) nga ipatuman sa gobiyerno ang national ID system.

Pinaagi niini, ang tanang bag-ong matawo, mahatagan na og numero ug ang tanang detalye sa iyang pagkatawo mabutang na sa iyang numero kun ID.

Mahimo na usab kining bugtong niyang ID nga magamit sa tanang transaksiyon, sa gobiyerno ug pribado, kon itandi sa sitwasyon karon nga hapit tanang departamento ug ahensiya sa gobiyerno mo-isyu kanato og ID.

Walay angay kahadlokan ang tawo nga walay gitago niining national ID system, hinunoa makahatag kini kanato og kasayon sa mga transaksiyon nga nagkinahanglan og ID. Nakatawa inay mohilak sa Sona. Unang namahayag si Presidential Communications Secretary Martin Andanar nga nakahilak siya sa dihang iyang gibasa ang script sa State of the Nation Address (SONA) ni Presidente Rodrigo Duterte.

Apan inay mohilak, nangatawa hinuon ang mga kongresista, senador, ug mga dinapit apil na ang mga kanhi presidente sa nasud sa maong SONA.

Ambut og nganong nakahilak si Andanar nga mibahakhak man hinuon og katawa ang mga tawong naminaw. Tingalig adunay mga tudling sa pakigpulong nga napatik sa teleprompter nga wala maapil og basa sa presidente.

Ang mga tawo nagtuo hinuon nga over-acting ang gihimo ni Andanar. Wala naman sad unta kinahanglana ang bulatik aron lang maminaw ang katawhan sa Sona sa presidente kay gipaabut kini sa kadaghanan.

MAAYOG PANGLANTAW

Dalaygon kining mga lakang nga gihimo ni Presidential Assistant for the Visayas Mike Dino. Human sa kusog nga uwan nga nakamugna og baha ug lunop sa daghang bahin sa Metro Cebu, iya dayong gihugpong ang kadagkuan sa Metro Cebu Development Coordinationg Board (MCDCB), mga regional director sa Department of Public Works and Highways (DPWH) ug National Economic and Development Authority (NEDA), Regional Development Council (RDC), mga mayor sa Metro Cebu ug ubang mga stakeholder aron hisgutan ang maong problema.

Sunod adlaw iyang giimbitar si DPWH Sec. Mark Villar aron ipresentar ang maong problema ug uban pang may kalabutan ang DPWH. Nisaad si Sec. Villar nga iyang isukip sa ilang budget ang gahin alang niini aron masulbad ang problema sa lunop ug baha sa Metro Cebu.

Sa Sona ni Pres. Duterte, iyang gihisgutan ang kalabut sa pagtukod og mass transit aron makatabang sa pagsulbad sa trapiko sa mga siyudad apil ang Metro Cebu.

Apan bisan sa wa pa kini i-anunsiyo sa presidente, giimbitar na ni Dino ang mga consultant sa Singapore aron moestudyo sa pagbutang og mass transit dinhi sa Metro Cebu. Kining klase sa opisyal sa gobiyerno ang atong gikinahanglan.