Di mosuporta sa kampanya batok druga?

NIBAHAD si Interior and Local Government Secretary Ismael Sueño sa pagpasakag kasong administratiba batok niadtong mga gobernador ug mga mayor nga di mosuporta sa kampanya batok sa ilegal nga drugas.

Mag-atubang sila sa kasong “serious neglect of duty” kon mograbe ang ilang suliran sa druga human sa unom ka buwan. “We will suspend them and we will lift their deputation over the police,” matod pa ni Sueño.

Wa kahay mayor dinhi sa Sugbo nga masuspenso tungod niining warning ni Sueño?

***

Si Cebu City Mayor Tomas Osmeña unang namahayag nga di na siya manginlabot sa kampanya sa kapulisan batok sa illegal nga drugas ug sa krimen tungod kay gipangrelibuhan ang pipila ka mga opisyales sa kapulisan supak sa iyang kabubut-on.

Pasagdan na lang niya, matod pa ni Osmeña, ang kapulisan sa ilang pagabuhaton kay maoy una niyang atimanon ang ubang mga suliran sa syudad sama sa paghuot sa trapiko, basura ug uban pa.

Wa na gani niya ihinayon og tugyan ngadto sa kapulisan sa syudad ang 40 ka mga sakyanan nga gamiton unta sa pagpatrolya. Gihunong sab niya ang paghatag og ganti nga P50,000 niadtong mga pulis nga makapatay og drug lord, tulisan ug ubang mga kriminal. Gibawi sab ang mga pusil nga gi-issue sa syudad ngadto sa kapulisan.

***

Si Sueño niingon nga di problema ang paghunong ni Osmeña sa paghatag og ganti ngadto sa mga pulis kay ang nasudnong kagamhanan nagsuporta man sa kapulisan. Apan iyang gikasagmuyo nga gihunong kini sa mayor.

Anyway, agwanta ta og iyang i-withdraw. I-supply nato kon unsa may kulang diri sa Cebu City,” matod pa ni Sueño. Pero matod pa niya, dunay pundok sa mga negosyante ug usa ka politiko nga di magpaila nga nidonar og P300,000 ngadto sa Police Regional Office (PRO) 7 aron iganti niadtong mga pulis nga makahipos sa mga drug pushers.

Apan kon mosaka ang problema sa drugas sa syudad sa Sugbo, mopasaka gyud ang presidente og kasong serious neglect of duty, matod pa ni Sueño.

***

Apan unsaon man nga na-busy man gud si Mayor Osmeña niining bag-o sa pagpamawi sa mga sakyanan nga gihatag ngadto sa kabarangayan, ilabi na niadtong di niya mga kapartido.

Hastang mga ambulansiya ug mga sakyanan nga gigamit sa mga emerhensiya gipangbawi. Maayo na man lang unta kadto kay sarang mga magamit, ilabi na didto sa kabukiran, kon dunay mga masakiton nga kinahanglang dad-on dayon sa opistal aron matabang ug matambalan.

Kon wa nay ambulansiya, adto na lang sakay ang mga pasyente sa habal-habal. O kaha mobalik sila sa kabaw ug balsa.