Kolor blue ang kahaw-ang
GISID-OK lang siya ug nasukarap. Grabe kon tiguwang na. Apan nakabawi pagtindog aron iphon ang naglut-od niyang mga kasakit. Bisag mga bug-at nagyunyon sa iyang kamot ug balatian nakaihap gihapon siya. Una, ang pagkawa ni Daluydoy, ang iro nga iyang gisagop dihang itoy pa kining nasaag sa ilang tugkaran.
Nagmaya siya dihang ang itoy midako kay lukop sa kahadlok ang iyang mga paghot sa kagabhion. Molanog kini ngadto sa halayo aron mosunod sa mga lakang sa kawatan---- mobabag sa ilang kangilad nga nagsiwil sa ilang mga tunob. Kadaghan na mabuslot ang tungang gabii sa pag-ayad sa mga kawatan kilid sa ilang balisbisan tungod sa mga paghot ni Daluydoy nga way giila sama kanila nga mangunay bisag kadugo o suod nga silingan.
Apan wa na si Daluydoy ang natingban sa iyang pagsalig sa mga takna sa kagabhion. Kamaayong ipanimawos! Kini unta ang daghong sa iyang panganti ngadto sa miutang sa kinabuhi sa iyang pinanggang iro. Kon wa bikta ug gipatay sa hilom, ila kadtong giilad og mga pagkaon aron mada sa halayo ug di na mopaghot hangtod sa hangtod.
Ang ikaduha mao ang pagbudhi ni Myra. Di man unta hanap ang salamin kay nagpangidlap sa kamatuoran. Apan wa lang niya ukba ang takob sa gipasabot. Kadaghan niya maabti ang iyang asawa uban sa ilang silingan nga batan-on nga si Magno mag-estoryahanay sa ilang terasa ubos sa kahayag sa dagitab.
“Ling, si Magno, anak ni kumpare Simon nga atong silingan, ka-estoryador.”
“Sir, good evening, gipapalit ko ni Ma’am og init nga pan, mangaon ta, Sir.”
Kadaghan na niya sila maabti nga ingon niadto nga puno sa kadasig hangtod kay tawo lagi gikusi siya sa pangabubho. Apan wa siya paanod sa kahuyang nga maoy pabilo sa kagubot. Usa ka adlaw migawas siya sa opisina ug miadtog Mall kay may paliton. Wa damha nakita niya si Myra nga giagbayan ni Magno nag-window shopping. Mialingkaag ang iyang mga balhibo nanindog ang mga gutling sa pangabubho. Buot niyang kumprontahon---- iwisi-wisi si Myra ug sumbagon ang batan-on. Apan may kalig-on nga migunit gihapon sa iyang kahuyang. Edukado siya! Di niya pakit-on ang publiko nga siya luog.
Nakahukom siya. Iyang daygan si Myra nga wa siya makagusto sa gibuhat niini. Giputos sa kamingaw ang balay sa iyang pag-abot. Sayo siya kay wa pa man motagbo niya ang kangitngit.
Dihay suwat sa lamesita gikan kang Myra. Iyang gibasa mikurog iyang tuhod. Katumbahon siya. Kay kini ang nasuwat: “Medardo, pasayloa ko, nanglakaw mi si Magno.” Kasakit sa budhi!
Ikatulo mao ang pagwakli niya sa ubos. Maayo ang iyang performance, apan wa niya makuha ang promosyon. Didto sa iyang kauban nga hingabsen sa trabaho. Kuwang sa katakos ug kahibawo. Apan kay suod sa tagduma kay kanunayng hatagag regalo nakuha ang hataas nga puwesto. Kamaayong isuntok sa haliging semento. Kamaayong utangon sa hari ang tagdumala nga kurakot kaayo!
Ang ikaupat mao ang pagtulis niya sa eskina sa dakbayan. Mao pay pagtuang sa ulan. Gikan sa iyang gipasilungan nga tindahan sa mga sapatos kusog ang iyang mga lakang subay sa aseras. Kalit gitagbo siyag duha ka tawo. “Tulis ni, ambing celpon ug kuwarta, dali!” Gitiunan siyag pistola sa usa ka bunguton. Ang kauban may taas nga korta. Wa siyay mahimo nakuha ang celpon ug gihatag niyang kuwarta nga usa ka suwelduhan. Pastilan ning mga tulisan maayong puohon ug sunugon sama sa mga drug lord ug mga pusher! Salamat kaayo sa bagong pamunoan gigukod, gipamatay sila.
Ang katapusan mao ang bunga sa mga kasakit nga mao ang kahaw-ang panahon sa iyang paginusara. Mora siyag kumuton sa kamingaw. Mora siyag hugasan sa mga pagbati. Dugay na man unta siyang nakalimot sa iyang kagahapon. Ania na sad siya naglingkod sa silyang tuwang-tuwang nagtutok sa panganod nga sa iyang tan-aw limpyo nga kolor blue. Nangagho siya ug mibalik sa paghinuktok ang tiguwang nga Medardo.