With all my heart

DALI

ko rang giasikaso ang akong kaugalingon. Migawas dayon ko sa akong kuwarto. Dako ang akong pagtuo nga si Rannel ang giingon ni Mama nga namisita nako. Pero nakahunong kog lakaw, kay di si Rannel ang lalaki nga naglingkod sa sopa sa sala, kondi si Samuel.

Kalit nga nawala ang gibati kong kalipay, maoy mipuli ang kalagot. Nagdali kong giduol si Samuel. Gitinighawakan ko siya.

“Nganong nia ka na sab, ha, Samuel? Kabaga gyud nimog nawong, uy!”

“Kon di ka makahatag og laing higayon nako nga mahalon tika, gusto lang nakong madungog gikan nimo nga gipasaylo na ko nimo.”

Mikarat ang tutunlan ni Samuel. Nakita ko sa iyang nawong nga kahilakon siya.

“Kaayo gyud kumuton sa imong nawong, uy, Samuel! Gisayun-sayon lang ko nimog biya dihang nakuha mo na ang tanan mong gusto nako? Karon, sayun-sayunon lang sab nimo ang pagingon nga pasayluon tika? Baga gyud kag nawong, Samuel! Pauli na! Ayaw nag anhi, ha!”

Way tingog si Samuel nga mibiya nako. Nagyawyaw kong misulod sa akong kuwarto. Wa ko na sab kapugngi ang akong kaugalingon. Nakahilak na sab ko. Nawala si Rannel nako pero mibalik si Samuel nako. Pagbuot kaha kini sa kapalaran aron matugkad ko ang tinuod kong gibati kon kinsa gyud nilang duha ang akong love?

Naglibog ko. Nahasol ko. Tinuod nga naghinam-hinam ko nga pamisitahan ni Rannel. Pero nasuta ko nga seryuso gyud si Samuel nga makigbalik nako. Kon buot sabton, may rason man sab siya nga maglibog kay namatay ang iyang inahan nga dunay kahiubos niya.

Naglagot ko sa akong kaugalingon, kay nganong naghatag pa gyud kog higayon nga hunahunaon si Samuel. Mipiyong ko kay gusto na kong matulog.

Nanglabay ang mga adlaw. Wa na magpakita si Samuel nako. Mao sab si Rannel, wa na gyud mopakita ug makig- communicate nako. Dunay mga gabii nga dugay kong makatulog. Mahunahuna ko ang duha nga naghatag og kahasol nako. Igo na lang kong manghupaw. Unya manglugmaw ang akong mga luha.

Usa ka gabii, namisita si Rannel nako. Wa ko batia ang kalipay kay nagduha-duha ko kon gimahal ba gyud ko niya.

“Nasayop ko, Katty. Di diay ang virginity sa babaye ang basehan sa tinuod nga pagmahal. Nia ko aron sultihan tika nga gidawat ko na sa tinud-anay kon kinsa ka karon kay tinuod kong nahigugma nimo.”

Gibati ko na ang tinuod nga kalipay. Nakagakos kog hugot kang Rannel.