Unang pagdepensa
WA man tuod mopasalig og knockout nga kadaugan, apan iyang gipanaad nga ibuga ang tanan niyang kanahas aron paghatag og saktong lingaw ngadto sa publiko.
Kini maoy gipalanog ni undefeated ug WBO Asia Pacific Youth super bantamweight chamion Jhack Teporta sa Omega Boxing Gym atol sa press conference kagahaponsa Who’s Next? Pro Boxing series nga ipahigayon sa Robinson’s Galleria ugmang adlawa.
Tepora (17-0, 12KOs) makigsinukliay sa iyang kumo batok sa taga Iligan City nga si Bryan Capangpangan (10-2-1, 7KOs) sa 10-rounder fight.
Kini maoy una niyang pagdepensa sa titulo nga iyang nalangkat sa sayong bahin ning tuiga.
Sa press conference kagahapon sa Pino Filipino Cuisine Restaurant sa Lahug, ang vice-presidente for Promotioons sa Omega Pro Sports International nga si Chad Canares mipahibawo nga ikaayuda na nila ang TV network GMA sa maong card nga libre ug abli sa pulbiko.
Ang GMA maoy official coveror sa maong promotions ug ipasalida kini human sa usa ka semana sa GMA NewsTV channel, matod ni Canares.
Iyang gipasabot nga interesado ang GMA nga makig-ayuda kanila sulod sa hataas nga kasabutan.
Masaksihan sa mga boxing fans ugmang adlawa ang tugob ug kulbahinam nga aksyon sa maong card nga adunay siyam ka parisan lakip na niini si Kenny Demecillo sa Omega Boxing Gym kinsa maoy karon ang WBF Asia Pacific bantamweight champion ug kanhi Olympian Mark Anthony Barriga kinsa subhan isip professional boxer.
Depensaan ni Demecillo (10-32, 7KOs) ang titulo batok sa taga Bukidnon nga si Rambo Lagos (81-2, 5KOs) sa 10-round fight sa 118 lbs division samtang si 2012 Olympian Barriga mosakbang ni Melvin Manangquil (1-1-2, 1KO) sa Manila sa 108 lbs division.
Lumad nga taga Panao, Davao del Norte, gipasalig ni Barriga nga lingawon gyud niya ang publiko ug iyang ipakita kon unsa moaway ang usa ka Olympian fighter.
“Deperensiya ang amateur ug pro, so dunay adjustment. Pero ang mga fans makapaabot og nindot nako nga away. Akong ipakita ang tanan nakong abilidad,” matod ni Barriga.
Laing wa pay pildi nga si Christian Araneta (11-0, 9KOs) sa Omega Boxing Gym gisakbang sa journeyman sa Bukidnon Charlie Cabilla (14-18-4, 2KOs) sa 108 lbs division.
Si Pio Paulo Castillo, ang president sa Omega Pro Sports International, nga bag-o pa man tuod sila ning ilang promotions apan mipasalig siya nga aduna pa unyay mga umaabog.
Mokompleto sa binukbokay mao ang away nila ni Jimboy Haya (8-2-2, 5KOs) batok Fabio Marfa (25-30-4, 12KOs); Feljon Taneo (5-1, 4KOs) batok Lenmar Prescillas (2-1,1KO); Tomjune Mangubat (4-0,4KOs) batok Arnel Acebuque (4-5,4KOs); Mark Vicelles (2-0, 2KOs) batok Jesrel Corabal sa Mike Boxing; ug Marjun Piencenaves sa Omega Pro Boxing batok Andrei Navarro sa Carmen, Cebu.
Ang tinimbangay ipahigayon karong udto sa Activity Center sa Robinsons Place Cebu.