Malisod nga tahas

Aces moduwa nga wala si Abueva batok Tropang TNT

GIANGKON ni Alaska coach Alex Compton nga maghatag kanila og dakong haw-ang ang pagkasuspenso ni Calvin Abueva sa dihang ilang ikasangka ang TNT Katropa karong gabii sa nagpadayon nga PBA Governor’s Cup sa Ynares Center sa Antipolo.

Sa nasayran nga ang PBA mipamulta ni Abueva og P22,000 ug usa ka duwa nga pagkasuspenso human kini naniko sa nawong ni Chris Ellis sa Ginebra atol sa ilang duwa niadtong Dominggo.

Moepekto ang pagkasuspenso niini karong adlawa.

“We play, I think, clearly one of the best teams in the league in Talk ‘N Text without one of the best players in the league, so obviously that has an impact on the game,” pasabot ni Compton.

“I don’t know that there’s any game that Calvin plays where you don’t feel his presence. You’re gonna feel his presence for sure,” dugang niya.

Samtang ang Alaska nakaposte og 1-1 nga baraha, ang Tropang TNT wala pa gyud makatilaw og kapildihan sulod sa tulo ka duwa.

Pangagpas ni Compton nga ubos sa ilang format diin ang top four maoy makakuha sa twiceto- advantage batok sa no. 5 ngadto sa no. 8 teams ug diin ang mahimutang sa 9-12 ang mangataktak, kinahanglan importanti kanila ang matag duwa.

Hinuon, way plano nga moapelar ang Alaska sa maong desisyon ug gani mapasigarbuhon sila sa gipakita ni Abueva sa pagdawat sa maong silot.

“There’s some clear rules in the PBA about elbows to the face. When the rule is clear and something happened, while I’ll always defend any of our players as a person, if the action happened, then the action happened and we just deal with the consequences and move on,” lakbit ni Compton.

Ang Alaska-TNT match magsugod sa alas siete sa gabii samtang sa first game, magbuwag ang dalan sa Blackwater ug Rain or Shine Elasto Painters sa dihang magsangka sa ila sa alas 4:15 sa hapon. Ang duha pulos adunay 1-1 nga baraha.