Tabal na-pressure, gikulbaa’g maayo?

DUNAY kausaban nga ipahamtang sa training program ni Mary Joy Tabal ning pila na lang ka adlaw nga nahabilin sa iyang training sa dili pa siya molupad paingon sa Rio de Janiero alang sa pinakadakong hagit sa iyang kinabuhi – ang Riol Olympics.

Sa niaging adlaw, ang iyang Japanese coach ug inila usab nga Olympic runner nga si Akio Usami ang mi-evaluate sa 27-anyos nga Cebuana runner ug daw sa dunay gamayng gikabalak-an.

Matod ni Tabal nga gisultihan siya ni coach Usami nga andam na gyud siya base sa iyang gipakitang performance atol sa training. Butang nga iya kining gikalipay.

Apan wala usab gitago ni Tabal nga samtang nagkaduol ang kompetisyon nagkagrabi na usab ang iyang gibating pressure.

“I just need to finish this week’s training here in Japan. Conditioning nalang kuwang — mental and physical,” matod niya.

“Gikulbaan gyud ko ug maayo. Bug-at kaayo ang pamati kay daghan gyud kaayo ko ug gi-huna-huna. I talk to myself sometimes trying to convince myself that it’s ok. Ako istoryahon akong kaugaingon tawn unsaon nako pag condition ako kaugalingon na dili kaayo maghuna-huna,” saysay ni Tabal.

Si Tabal atoa sa Japan magtraining.

Molarga siya paingon sa Rio de Janiero, Brazil karong Agusto 2 aron moapas sa Philippine delegation nga naguna’g abot kaniya didto sa maong nasod. Didto usab nagpaabot kaniya ang ilang dugay nang coach nga si John Philip Duenas kinsa gipadala mismo sa iyang sponsor nga mao ang Motor Ace Philippines- Kawasaki aron motabang kaniya. Kini gikalipay ni Tabal.

“I was relieved when Motor Ace-Kawasaki decided to send him because it is a lot different when there is someone who already know your needs because he already knows me as an athlete but my sport as well. The concerns for marathon are different from the concerns of other track and field events,” padayag ni Tabal.

Gipasabot ni Tabal nga adunay kausaban sa iyang training program si coach Usami nga maoy iyang magamit sa panahon nga moabot na siya sa Rio.

“Coach Usami said that his main concern for me right now is the time between my arrival in Rio and the day of the race. I will be spending a few more days in Rio before my event. He wants me to maintain the condition that I am in now.”

Tug-an ni Tabal nga gisaysayan usab siya ni Usami sa kasinatian niini sa pagsalmot sa mga dagkong lumba.