3 ka tawo gipamusil, patay

TULO ka mga tawo ang gipamusil patay kagahapon sa kaadlawon sa mga tawo nga nanagsakay og motorsiklo.

Nidala kini ngadto sa lima sa nangamatay sa pagpamusil dinhi sa Dakbayan sa Sugbo miaging duha ka mga adlaw.

Mga pasado alas 12 kagahapon sa kaadlawon, nagpasuso sa iyang anak nga babaye si Pacloy Nabua samtang sila nagdulog sa usa ka folding bed sa Quijano compound sa Brgy. Calamba.

Sa pasiuna nga imbestigasyon nga gihimo nila ni SPO1 Wetzil Berry ug mga kauban sa Homicide Section nagbutyag nga naghigda si Nabua uban sa iyang anak nga babaye sa folding bed.

Niabot ang usa ka wa hiilhing tawo nga sakay og motorsiklo, niduol kaniya ug nipusil makaupat ka mga higayon.

Naigo sa iyang ulo ug dughan si Nabua apan wa mapagi ang iyang anak.

Human sa pagpamusil, ang gunman daling nisibat sakay sa naghuwat nga motorsiklo.

Mga silingan nga nakadungog sa mga buto sa pusil wa dayon manggawas sa kahadlok.

Dihang namingaw na, ilang gisusi ang dapit ug napalgan si Nabua nga naglunang sa dugo samtang ang anak naghilak tupad niya.

Napalgan sa kapulisan ang upat ka mga kabhang sa bala gikan sa armas nga kalibre 45 nga pistola.

Gikataho nga may mga tawo nga nakakita sa hitabo, apan wa mokooperar sa kapulisan.

Mga usa ka oras ang nakalabay, laing duha ka mga tawo ang gipamusil sa upat ka mga tawo nga nagmotorsiklo sa may Wisdom st., Peace Valley, Barangay Capitol.

Ang duha ka mga lalake, kinsa wa pa mailhi hangtod sa pagsuwat ning taho, gibana-bana nga nagpanuigon og 20 ug 30 anyos.

Ang usa sa mga biktima adunay patik sa buko-buko nga ‘ Anak ni Baby Ama’.

Ang lalake gibana-bana nga kapin pa sa 20 anyos ang edad, nagtshirt og itum, nag-short pants og pang-sports.

Ang ikaduhang lalake gibanabana nga kapin sa 30 anyos, nagsul ob ug puti nga t-shirt ug blue pants.

Ang duha pulos gamayon og lawas.

Matod ni SPO1 Wetzil Berry sa Homicide nga naglakaw ang duha ka mga biktima daplin sa dalan.

Ningsugat kanila ang duha ka mga motorsiklo, ningpahinay sa pagpadagan ang mga driver ug dayon nanghunong.

Ang duha ka mga backrider ningkanaug ug ningduol sa duha dayon gitagsaan sa sa pagpamusil.

Human maigo sa nagkadaiyang parte sa lawas ang duha ug nangatumba, daling ningpalayo sa dapit ang mga gunman sakay balik sa ilang motorsiklo.

Mga tawo sa palibot lakip na sa mga drayber sa habal habal wa makaila sa duha ka mga biktima.

Pito ka mga kabhang sa mga bala sa armas nga kalibre .45 ang napalgan sa dapit.

Ang Homicide Section makig coordinate sa ubang buhatan sa kapolisan ug sa City Jail alang sa posibleng pag-ila sa duha.