Ikatulong bagyo misud sa RP
NAHIMO nang bagyo ang kaniadto nga Low Pressure Area (LPA) sa sidlakang bahin sa dakbayan sa Borongan, Eastern Samar.
Kini mao ang gitawag karon nga bagyong Carina diin mao kini ang ikatulong bagyo sa nasod karong tuiga.
Mao usab kini ang rason sa kusog nga uwan kagahapon ug padayon nga uwanon ang weekend sa Kabisayan tungod niining bagyo.
Matod ni Engr. Oscar Tabada, ang pangu sa Philippine Atmospheric, Geophysical and Astronomical Services Administration (Pagasa) Visayas, nga dili kaayo kusog ang maong bagyo diin base sa 11:00 sa buntag nga weather bulletin sa maong ahensiya anaa kini 195 kilometro sa Borongan City.
Gadala ang maong bagyo og hangin nga 45 kilometros matag oras.
Matod ni Tabada nga dili maka landfall ang maong bagyo ug gikatakda nga anaa ang mata niini karong buntag sa 280 KM sa sidlakan sa Virac Catanduanes.
Kagahapon, kapin sa duha ka oras nga nasinati sa Metro Cebu ang kusog nga uwan diin nitala kini og 15 millimeters sa uwan matag oras.
Dugang ni Tabada nga magpadayon ang kusog nga uwan karong adlawa ug nitambag kini nga magdala og payong o panagang sa uwan kon mogawas sa balay.
Sa pagkutlo ning balita, wala pa’y natala nga tropical cyclone warning signal lukop nasod.
Ugmang adlawa, gikatakda nga anaa sa 255 KM sa sidlakang bahin sa Casiguran, Aurora ang maong bagyo ug hinay na usab ang uwan nga masinati sa Sugbo ugma sa hapon.
Gididan kadtong mga mananagat nga duol sa sidlakan sa pagpanagat tungod sa posibleng dagkong bawod.
Gipahimangnoan usab ang tanang Disaster Risk Reduction and Management Council sa apektado nga dapit nga padayong magmonitor sa posibleng pagbaha ingon man ang pagdahili sa yuta.