Kinahanglang drug lord masikop: Gullas

BAG-ONG hepe sa Talisay City Police Office (TCPO) gimandoan nga modakop og drug lord sulod sa usa ka buwan niya sa katungdanan.

Kini human nga way lipudlipod nga giangkon ni Mayor Eduardo Gullas ang iyang kasagmuyo ngadto sa kadagkuan sa kapulisan nga wala siya konsultaha paghulip sa iyang hepe nga si Supt. Germano Mallari.

Matod ni Gullas nga atol sa ilang panagtagbo sa pangulo sa Cebu Provincial Police Office (CPPO) nga si Senior Supt. Jose Macanas uban nila ni Mallari ug Supt. Aileen Recla sa dihang gihimo ang turnover of command iya kining giprangkahan nga wala siya malipay sa hitabo.

Kini tungod kay tataw sa balaod nga ang mayor hatagan og tulo ka mga pangan sa opisyal ug ang mayor maoy mopili sa iyang gustong nga mamahimong hepe sa kapulisan.

Matod sa mayor nga isip usa ka abogado ug nahibawo sa balaod dili unta kini mahitabo.

Mao kini hinungdan nga nakasabot siya sa gibati ni Mayor Tomas Osmena sa dakbayan sa Sugbo human usab gihulipan ang hepe sa Cebu City Police Office (CCPO).

Apan gipasaligan siya ni Macanas nga si Recla usa lang ka officer-in-charge sulod sa usa ka buwan ug mahimo kining hulipan sa iyang gusto human sa usa ka buwan.

Nagkanayon si Gullas nga dili mahimo nga hatagan sila og dakong katungdanan ug obligasyon pagpatuman sa kahusay ug kalinaw sa ilang dapit ug sila ang manubag sa katawhan apan wala silay gahum pagpili sa ilang hepe.