3 patay nakaplagan sa Romualdez airport

TACLOBAN CITY - Tulo ka patayng lawas ang napalgan sa Daniel Z. Romualdez Airport sa Tacloban City gahapon sa alas 6:00 sa buntag.

Ang tulo giingong nalambigit sa ilegal nga drugas tungod sa karatola nga gibutang sa ilang lawas nga ‘Pusher ako Lord patawad’.

Ang mga biktima naglangkob sa duha ka babaye ug usa ka lalake.

Ang tulo giila nga sila si Jason Boclotan, Rowena Rosales ug Cheche Mantile.

Posible gihimo ang krimen nianang kadlawon apan nadawat sa kapulisan ang alarma alas 6:00 na sa buntag.

Ang duha ka babaye napalgan sa likod nga bahin sa sakyanan samtang si Boclatan sa gawas sa sakyanan na napalgan.

Itom ang awto nga gisakyan sa mga biktima nga dunay tatak 26, dark angel ug skyfire.

Blangko pa karon ang kapulisan kun kinsa ang mihimo sa krimen.

Padayon pa ang ilang imbestigasyon.

Alas 10:00 sa miaging gabii, usa ka wa pa mailhing lalake ang napalgang patay sa kasagbutan sa Apitong, Tacloban City.

Ang biktima giingong nalambigit gihapon sa ilegal nga drugas tungod sa karatola nga ‘Drug pusher ako Lord patawad’.

Ang lalake gituhoang biktima sa summary execution. Nagsulob kini og puti nga tshirt ug pink nga short ug naa sa 35 ngadto sa 45 ang edad.

(MEL CASPE) PATAY. Gisusi sa mga sakop sa Scene of the Crime Operatives (SOCO) sa kapulisan sa dakbayan sa Tacloban ang tulo ka mga patayng lawas diin ang nagsul-ob og pink nga senina mao si Cheche Mantile ug tapad niya si Rowena Rosales samtang ang nalayo kanila...