Chatto, Yap, Veloso mihatag og garbo

BOHOL Dakong garbo sa probinsya sa Bohol ang sunodsunod nga pagkapili sa mga politikong Bolanon isip representante sa tagsatagsa nilang nahilakipan nga hugpong o liga diin nahatagan silag oportunidad nga pangulohan ang hugpong.

Una na niini ang pagkapili ni Gob. Edgar M. Chatto isip secretarygeneral atol sa eleksyon nga gipahigayon sa League of Provinces of the Philippines (LPP).

Mismong si DILG Secretary Ismael Sueno mao ang mipapanumpa sa mga bagong napiling mga opisyal sa kahugpungan sa LPP National Executive Board.

Sa laing bahin, wa usab nagpauwahi ang dakbayan sa Tagbilaran diin nanumpa usab si

Tagbilaran City Mayor John Geesnell Yap II isip regional representative sa tibuok Central Visayas sa League of Cities of the Philippines (LCP).

Naguna usab sa rehiyon 7 ang dakbayan sa Tagbilaran sa Cities and Municipalities Competitiveness Index (CMCI) nga gipahigayon sa National Competitiveness Council (NCC).

Diin nalapsan sa Tagbilaran ang mga siyudad ug kalungsuran sama sa Naga, Danao, Toledo, Bogo, Talisay, Tanjay, Carcar ug Canlaon.

Sa kinatibukan ning tuig 2016, misaka kini ngadto na sa ika25 ang dakbayan sa Tagbilaran kumpara niadtong miaging tuig (2015) diin ika34 ang siyudad diin adunay 110 ka mga siyudad nga tibouk Pilipinas.

Ang National Competitiveness Council nga ranking maoy nagsukod sa katakos sa mga Local Government Units (LGUs) basi sa tulo ka aspeto sa pagasenso nga nilangkob sa “Economic Dynamism, Government Efficiency ug Infrastructure”.

Samtang si Tagbilaran City Vice Mayor Jose Antonio Veloso, mao usab ang napiling interim national president sa Vice Mayors’ League of the Philippines (VMLP).

Si Veloso mao ang bayaw ni Gob. Chatto.