Banat batok sa hukmanan
HINGPIT ang pahuway kon dili na makamata sa dayon. Ning panahona nga mao ra’g wala na’y bili ang kinabuhi— kay labihan kabarato ug kayano sa kamatayon— ambot lang og kinsa na po’y sunod magsiga ang mata, maghayad diha sa da’n hangtod sa kaugalingong hayâ lahos sa lubnganan.
Kubkobon ug lugiton ang nagkalawom nga gamot sa salaod kun krimen. Mao ni ron ang pasingot sa kapulisan ubos sa bag-ong pamunoan ni Duterte. Paningkamotan kuno nila ang pagpakgang sa suliran gumikan sa gausbong nga ginadiling druga. Sukad sa bahad ni Duterte alang sa mga badlongon nga tigpayuhot niining gaaso nga kagaw, wala’y adlaw nga dili nato hisayran ang mga nakaplagan nga mga lawas sa gipasanginlang sagbot kuno sa katilingban— gihiktan og masking tape, gabuy-od ug kuwang na lang molutaw sa gabanaw nga dugo samtang gipaskinan ug pasidaan alang sa ubang mga pusher. Sayon ra baya silang tumban sa ilang kakabos ug kagamay, dali rang tusdikon dili sama sa mga drug lords nga hayayay sa ilang pagpalandong ubos sa higanteng anino sa narcopolitics. Bahala na lang nang babayeng gitaptapan ang mata, gahupot og timbangan nga simbolo kunohay sa kaangayan.
Binuhatan kuno ni sa mga wala-pa-hiilhing mga berdugo nga gakumkom sa balaod samtang gasakay og motorsiklo. Kining vigilante killings, segun pa sa kapulisan, basin paugat ra pod sa kaubang pushers aron hingpit nang mahilom ang galaraw nga mopyait. Lagmit samot na gyod nga gakurog ang mga yanong tigpahuyot! Bisan daghan nang nasayran natong nitahan sa ilang kaugalingon ug nanumpa sa kadagkoan nga sila moundang, padayon gihapon silang gihipos lahos sa ilang lungon.
Ihaya na pod unya ang kagamhanan kon pabilin nga mao ra’g wala na’y bili ang pamaagi sa balaod. Lupig ra unya’y bungi kanang gapasiatab sa kamahinungdanon anang giingon nga “due process” ug “presumption of innocence until proven guilty” kon ang mga gikatahapan dali rang itumbok nga sad-an pinaagi sa pag-salvage nila. Dayag nga kining minangtas nga pagpatuman sa lasangnon nga kinaiya sa mga ihalas wala’y pagtahod kon unsa’y maangayon nga pagsubay sa sumbanan aron maila kon kinsa’y sad-an ug angayan pahamtangan sa tukmang silot. Kuyaw kon bisan unsa na lang unya’y pasumangil alang sa mga galagot nato. Bisan wala’y labot sa ginadiling drugas, dali ra tang patumbahon kay barato ra ang kinabuhi. Pastilan, haskang sayona ra pagpalaban sa mga mga mamumuno nga sinuholan! Dili ba kini dakong panghimaraot sa atong mga sinaligan sa balaod? Nan, unsa pa’y pulos sa mga pulis ug sa mga abogado kon dili na ta mosalig sa atong hukmanan?