BJMP angay sab mag-revamp

SAMTANG nalinga ang atong mga dagkong opisyal sa Philippine National Police (PNP) niining subsub nilang lahugay sa mga hepe sa kapulisan, maayo sab siguro nga lili-on sa atong mga kadagkuan sa Bureau of Jail Management and Penology (BJMP) ang Cebu Provincial Detention and Rehabilitation Center (CPDRC).

Sa niaging semana, usa ka binilanggo, si Arnel Mait, ang yano ra nga nakaeskapo nga giingong diha ra mismo moagi atubangan sa CPDRC.

Hangtod karon, wa pa gihapon masignit og balik si Mait human napakyas ang negusasyon niadtong Hulyo 27. Giingon nga personal nga nakig-estorya ni Mait si Marco Toral, ang consultant sa CPDRC, kinsa tuyo nga miadto sa lungsod sa Argao diin gikataho nga didto nagtago-tago ang eskapo.

Kon ang consultant maoy nangunay sa pag-estorya ni Mait, unsa na man diay ang gibuhat ni acting jail warden Romeo Manansala nga siya man unta ang may igong gahom sa pagbuhat sa ingon? Mora na man hinuon og ang consultant mao nay frontliner sa pagdumala sa CPDRC.

Sa niaging tuig, aduna usay laing mipuga sa CPDRC nga giilang si Michael dela Rosa. Hangtod karon, kaluoy sa Diyos, wa pa gihapon madakpi og balik. Kagahapon, gikataho usab nga moabot na ngadto sa walo ka mga binilanggo ang nangamatay sulod ning buwana tungod sa nagkalainlaing sakit.

Gikataho sab nga nagpabuto sulod sa iyang opisina si Toral sa niaging adlaw isip kuno warning sa upat ka mga badlungon nga piniriso nga nagsigi gihapon og sugal. Tungod niining pipila lang nga gipanghisgutan sa unahan, daw sa og dili na epektibo si Manansala sa iyang pagka jail warden. Panahon na siguro nga siya hulipan, total dugaydugay na man ni siyang nadestino sa CPDRC.