ALS para sa mga ni-surender
SA mga Tokhang nga akong nasaksihan nga niresulta sa pag surender sa liboan ka mga drug personality, uban kanila ang daghan kaayong batan-on. Pananglit didto sa Station 6 ug Station 8 sa Cebu City Police Office dunay mga batan-on nga nitahan ang nipadayag og ka andam sa pagbalik sa pageskwela human sa pipila ka tuig sa pagka gumon sa ginadili nga druga.
Ang uban nila igo lang nakatapos sa elementarya. Ug kasagaran nila naa pa sa high school.
ALTERNATIVE
Tungod niini tuyo nakong giduaw ang buhatan ni Department of Education Cebu City Division Superintendent Dr. Bianito Dagatan aron ipresentar ang ilang sitwasyon. Nindot ang tubag ni Dagatan. Matod niya pinaagi sa programa nga Alternative Learning System kun ALS mahimong makapadayon sila sa pag-eskwela nga di na kinahanglang moadto pa sa eskwelahan. Nipuno si Dagatan nga kong asa sila nagpuyo mahimong adto ra sab sila moreport para sa ALS. Ang naka nindot kay di sab kada adlaw sila nga mag-abot. Unya pinaagi sa ALS mahimong mo-qualify sila nga maka enrol sa kolehiyo. Si Dr. Dagatan nitugan nga pinaagi sa mga mobile teachers ang mga tinunan pundokon sa usa ka lugar sama sa gym, kapilya o bisan unsa nga pasilidad nga mahimo sila nga magklase. Ang buhatan ni Dagatan makig-alayon sa mga barangay kapitan aron masugdan ang maong programa. Di lang ni para sa dakbayan sa Sugbo. Tibuok Pilipinas kini nga programa basi sa Republic Act 9155. Unya di lang sab ni sa mga batan-on apil na ang mga hingkod. Busa mga ginikanan palihug hinayhinaya na ninyo pagpasabot ang inyong mga anak labot ning maong programa. Kay kong ready na ang inyong mga anak mahimo na dayon silang magsugod karon dayon. Kini tungod kay ang ALS makasugod man bisan unsang bulana. Di na maghulat og Hunyo nga maoy isugod sa regular nga klase. Ang mga Barangay Kapitan atong awhagon nga maghimo na og pagpanglista kinsa ang mopahimus sa maong programam. Apil na gani ang wa mag apil-apil sa bisyo sa iligal nga druga nga maisip nga out of school youth ug out of school adult.
DMDP
Unya ayaw ninyo kalimti kadtong gipahibalo nako dinhi nga ang Department of Manpower Development & Placement kun DMDP sa Cebu City Government andam sab mohatag og training niadtong interesado nga makakat-on sa nagkadaiyang abilidad.
Matod sa pangulo sa DMDP Fidel Magno nga bukas sila alang niadtong gusto nga makabaton og certifico sa pagka plumber, mananahi, electrician, electronic technician, plumber, beautician, collinary, house keeping ug daghan pa nga skills training program nga mahimong humanon sud sa tulo ka bulan. Siya nidason nga mahimo gani ang uban niini nga anha ra sa barangay diin nagpuyo ang mga tinun-an.
Sa mga nagdali karon dayon mahimo kamong mobisita sa buhatan ni Magno nga nahimutang sa 2nd floor sa Ramos Public Market. Pakisayod ug pahimusli kining talagsaon nga kahigayonan aron nga kamo makabaton og mas arang arang nga trabaho. Nahibalo ba mo nga daghan na sa mga gradwado sa DMDP ang naka trabaho sa gawas sa nasod ug ang uban nagnegusyo na.