Ikaw wala mag-inusara
KADA relasyon, normal nga duna gayo’y mahitabong panagbangi, panag-away, hilak, katawa, kalipay, ug kaguol. Kini mahitabo kay dili man ta robot ug dunay pagbati ug emosyon nga maoy nagdikta sa atong ubang parte sa lawas ug huna-huna.
Kung kita masuko, masakitan, magselos o maigo ang garbo dunay posibilidad nga makapagawas kita og mahait og wa kinahanglana nga mga pulong o buhat nga makapasakit sa uban. Dinhi magsugod ang problema nga sundan sa stress.
Kada usa nato dunay lain-laing reaksyon sa stress. Ang uban magsuka ug dili na ganahan mokaon, ang uban magmaoy og magsige na lang og hilak, ang uban mag mokmok ug dili ganahang mogawas, maglisod sa pag-ginhawa, ma absent-minded, daling maratol, magtanga, magkalibanga ug uban pa.
Inig lapdos sa sakit sa kasing-kasing, mosunod ang dili masabtang kahalang nga imong mabati. Paminaw nimo murag nagpas-an ka sa tibuok kalibutan. Ang mubo og resistensiya sa pag-atubang ini daling madiskaril sa iyang pang adlaw-adlaw nga naandang ginbuhaton. Ang kuyaw kon kini dili ma-agapan ug way suporta sa kabanay ug mga higala kay mosantop kini sa pagbugti sa kaugalingon o pagliso sa pangisip.
Dunay paagi nga gitampo akong suod nga higalang psychologist aron malikayan ang negatibong epekto sa kaguol ug stress.
Sa usa ka papel, ilista ang tanan nimong grasyang nadawat ug mga maayong hiyas sukad ka gipakatawo. Pananglitan duna kay mga anak, bana, ginikanan nga mo abiba nimo sa imong kalipay ug kasakit, duna kay kaugalingong balay, sakyanan, kurso nga nahuman, trabaho, maayong lawas ug uban pa. Sa pikas nga bahin sa pahina ilista sab ang imong tanang positibo mga hiyas sama sa pagkabu-otan, pagka matinud-anon, pagka matinabangon, maabi-abihon ug uban pa.
Samtang sa luyo nga bahin ining maong papel, isuwat sab ang imong mga dili maayong nabuhat ug hiyas. Pagkahuman itandi kay seguro ko nga imong ma-amgo nga mas daghan ka og mga maayong hiyas, grasya ug nabuhat kaysa imong nahimong maihap nga hiwing binuhatan.
Ngano? Kita tanan gipakatawong maayo ug susama sa dagway, hiyas ug kina-iya sa labaw’ng Makagagahom nga maoy naghimo nato maong bisag unsaon mopatigbabaw gyud ang kaayo sa atong pagkatawo.
Ang kalisud nga imong gibati temporaryo ra og dili magdugay. Busa, sugdi karon paglista ug ihap ang dili mapalit nga imong mga bahandi sama sa hangin nga imong giginhawa, atop nga imong gipasilungan, pagkaon sa lamisa, tubig nga mainum, sinena nga gisulob, kasing-kasing nga nakapasaylo sa mga nakalapas nimo, way puas nga pagmahal sa anak, kapikas, bff o ginikanan ug labaw sa tanan init ug hugot nga pagtuo nga ikaw wala mag inusara og dili biyaan sa kahitas-an.