Wa nay suporta

Dear Noy Kulas,

Tagoa lang ko sa ngan nga Rose, 27 years old, taga Minglanilla. Kining akong problema mahitungod sa amahan sa akong duha ka mga anak. Wa mi nakasal niya kay minyo ko sa akong unang bana. Kining akong kapuyo niuli sa ilaha sa Mindanao niadtong Enero ug wan a mobalik.

Nagsige mi og away kay di pabadlong aron moundang sa iyang bisyo. Di siya magpabadlong kay dihang nagkita na kuno mi, duna na siyay bisto. Niabot sa punto nga nakigbuwag siya nako kay di na kuno siya makaaguwanta sa akong batasan.

Unsay angay nakong buhaton, Noy Kulas, karon nga wan a siya mosuporta sa among mga anak? Makagukod kaha ko niya nga di man mi kasado? Please tambagi ko unsay angay kong buhaton.

ROSE

Rose,

Bisan di mo kasado, basta iyang giila ang inyong duha ka mga anak nga iyaha, makagukod ka base sa atong balaud. Wa mag-ingon ang balaud nga kinahanglan makasal ang babaye ug lalake aron makasegurong dunay suporta. Labina karon sa balaud nga nanalipod sa katungod sa kabataan. Matawag na gani kini nga child abuse.

Bisitahi ang Public Attorney’s Office (PAO) aron magiyahan ka sa imong angay nga pagabuhaton kay legal nga lakang ang imong gikinahanglan. Unsay tambag sa abogado sa PAO, sunda kini. Basta ang di pagsuporta sa mga anak usa ka krimen nga mahimong ikapriso sa ginikanan nga wa magsuporta.

Kon wa siyay tarong trabaho ug naa pay bisyo, kana lisod hinuon kay unsa may imong mapuga gikan niya? Hunahunaa usab og maayo kon angay bang haguan ang paggukod sa tawo nga posibleng maglisod sa pagsuporta sa kaugalingon. Apan kon naa siyay maayong trabaho, gukda siya aron makapanubag sa iyang mga responsibilidad.

NOY KULAS