Mga lumolupyo supak sa reclamation project
BISAN wa pa masugdi ang giplanong reclamation project sa lungsod sa Minglanilla, aduna nay grupo nga ningpadayag sa ilang pagsupak atol sa public hearing niadtong Huwebes.
Ang mga lumolupyo sa tulo ka mga barangay nga nanambong sa public hearing ningpadayag sa ilang pagsupak sa 100 ka hektaryang luna sa reclamation project.
Nabalaka ang mga lumolupyo nga mangawad-an sila og kapuy-an.
Si Brother Peter Simon Francis Jardinico sa Franciscan Friars of Charity ug maoy representante sa mga lumulopyo lakip sa mitambong sa public hearing nga gipatawag sa kagamhanan sa Minglanilla ug Ming-Mori Development Corporation sa Minglanilla Sports Complex.
Lakip sa ilang reklamo nga ang lungsod sa Minglanilla napakyas pagtabang kanila.
Ang ilang gikabalakan og maayo mao ang gituohan nilang dakong kadaot sa kinaiyahan ug kalikopan sa higayon nga sugdan na ang proyekto.
Apan ang mga opisyal sa lungsod pinaagi kang Municipal Administrator Concordio Mejias nipasalig nga ang lokal nga kagamhanan ug developer mismo andam motabang sa apektadong mga residenti.
Nagplano ang lungsod sa pagpalit og luna aron maoy magsilbing relocation site kana kon gikinahanglan.
Nagkanayon si Mejias nga sagad usab sa apektado nga mga residente di maoy nanag-iya sa luna nga ilang gipuy-an.
Gibanabana ni Jardinico nga di moubos sa 3,000 ka mga lumolupyo ang apektado ug siya nabalaka nga mawagtangan kinig balay kon di mahatagan og relocation site.
Nibahad si Jardinico nga kon gikinahanglan, mopasaka silag kaso ngadto sa korte aron mapugngan lang ang maong proyekto.
Ang chairman sa Ming-Mori Development Corporation, Jose Soberano III, niingon nga di na bag-o alang kanila nga adunay moreklamo sa proyekto.
Apan nipasalig siya nga ila kining atimanon kay kon kini mahuman, ang mga lumolupyo ug lungsod maoy makabenipisyo niini.
Gibutyag ni Soberano nga ang 100 ka ektaryang reclamation project usa ka commercial zone nga mogasto og P5 bilyones.
Mahuman kini sulod sa tulo ka tuig ubos sa public-private partnership (PPP).